«Зорланып, азапталған»: Солтүстік Кореядан қашып шыққан әйел президент Ким Чен Ынды соттауды сұрады
Ол қазір Оңтүстік Кореяда тұрады
Солтүстік Кореядан қашып шыққан әйел ел лидері Ким Чен Ынның үстінен арыз жазды. Ол қамауда отырған кезде бастан өткерген зорлық-зомбылық үшін ел билігін жауапқа тартуды талап еткен, деп хабарлайды Azattyq Rýhy
ВВС-дің жазуынша Чхве Мин Гён атты әйел 1997 жылы елден қашып, 2008 жылы мәжбүрлі түрде қайтарылған. Ол Солтүстік Кореяға оралған соң жыныстық зорлық көріп, азапталған.
Оңтүстік Кореядағы құқық қорғау ұйымының мәлімдеуінше, бұл Солтүстік Кореядан қашып кеткен адамның сол елдің режимін сотқа беруі алғаш рет кездесіп отыр.
Бұған дейін Оңтүстік Корея соттары ұқсас істер бойынша Солтүстік Кореяны айыптаған, дегенмен олар Пхеньян тарапынан ескерусіз қалған.
Арызда Ким Чен Ыннан бөлек, Пхеньянның тағы төрт шенеунігі көрсетілген. Құқық қорғау ұйымы осы іс бойынша БҰҰ мен Халықаралық қылмыстық сотқа да жүгінуді жоспарлап отыр.
«Солтүстіккореялық режим тарапынан азап пен зорлықты бастан өткерген жәбірленуші ретінде мен Ким әулетін адамзатқа қарсы қылмыстары үшін жауапқа тартуды өзімнің жауапкершілігім деп сезінемін», – деді Чхве.
Чхве Мин Гён 2012 жылы екінші рет Солтүстік Кореядан қашып, Оңтүстік Кореяға қоныстанды. Ол өзіне жасалған зорлықтан кейін дәрі-дәрмекке тәуелді болып қалған.
