Әлемде алғаш рет робот адам көмегінсіз операция жасап шықты

Джон Хопкинс университетінің ғалымдары робототехникадағы керемет жетістігін көрсетті. Видео арқылы операция жасауды үйренген робот науқастың өт қабына операция жасап шыққан. Ота барысында ол дәрігердің берген командасына назар аударған. Зерттеушілердің айтуынша, робот операция жасап үйреніп жүрген жас хирург сияқты айтқанды мүлтіксіз орындаған, деп хабарлайды Azattyq Rýhy.

«Бұл жетістік бізді нақты хирургиялық тапсырмаларды орындай алатын роботтардан шынымен де хирургиялық процедураларды түсінетін роботтарға көшуге мүмкіндік береді. Яғни, болашақта осындай ақылды роботтар күрделі әрі күтпеген жағдайларда да дәрігердің көмегінсіз, өз бетінше ота жасай алатын болады. Біз сол күнге жақындадық», – деді медициналық робототехника маманы Аксель Кригер.

SRT-H атты хирургиялық трансформер-робот операцияны өзі орындай алады. Ол науқастың дене құрылымына бейімделіп, жағдайға қарай шешім қабылдайды, өз қателігін өзі түзете алады.

Бұл робот ChatGPT сияқты жасанды интеллект жүйесіне негізделіп жасалған. Ол адам дауысына жауап бере алады, мысалы: «өт қабын ұста» немесе «сол қолды сәл жылжыт» деген бұйрықтарды орындайды. Сонымен қатар, робот берілген нұсқаулардан сабақ алып, «миына» тоқиды.

SRT-H роботы өт қабын алып тастау операциясын хирургтердің шошқа мәйітінде жасаған видеосынан қарап үйренген. Команда бейнематериалға субтитрлер қосып, оқытуды күшейтті. Видеоларды көріп болған соң, робот операцияны 100% дәлдікпен орындаған.