Иран ядролық қарудан бас тартуға дайын екенін мәлімдеді

Иран билігі ядролық қаруға иелік етпейтініне кепілдік беретін халықаралық келісімге қол қоюға дайын екенін мәлімдеді. Бұл туралы елдің Сыртқы істер министрі Аббас Аракчи хабарлады, деп хабарлайды Azattyq Rýhy РБК-ға сілтеме жасап.

«Біз Иранда ядролық қарудың жоқтығына кепіл бола алатын кез келген келісімге дайынбыз. Өйткені біздің ұстанымымыз бойынша, ядролық қару – тыйым салынған», – деді Аракчи.

Алайда министр Тегеранның бейбіт мақсатта ядролық энергияны пайдалану құқығынанбас тартпайтынын баса айтты. Оның сөзінше, Иран азаматтық атом бағдарламасын дамытуды өз құқығы ретінде сақтап қалуы керек.

Аракчи: «Шабуыл тоқтаса – біз де жауап бермейміз»

Иранның Сыртқы істер министрі Израиль тарапынан шабуылдар тоқтатылған жағдайда, Тегеран да жауапты әрекеттерін доғаруға дайын екенін жеткізді.

«Егер Израиль біздің нысандарға соққы беруді доғарса, біз де жауап бермейміз. Бірақ қазіргі әрекеттер Тель-Авивтің Иран мен АҚШ арасындағы ядролық келіссөздерге кедергі келтіру мақсатын көздейді»,– деді ол.

АҚШ-қа сенімсіздік сақталып отыр

Министрдің айтуынша, АҚШ тарапы Иранға Израиль операцияларына қатыспайтыны туралы уәде берген. Алайда Тегеран бұл мәлімдемелерге сенімсіздікпен қарайтынын ашық айтты.

«Бізге Вашингтоннан операцияға қатыспайтыны жайлы хабар жетті. Бірақ бұған нақты дәлелдер қажет»,– деді Аракчи.

Ядролық келісімнің маңызы неде?

• Иран мен АҚШ арасындағы ядролық келісім – халықаралық қауіпсіздік үшін стратегиялық құжат.
• 2015 жылы қол қойылған бастапқы келісімнен кейін 2018 жылы АҚШ президенті Дональд Трамп одан біржақты шыққан.
• Содан бері тараптар келісімді қайта жандандыру жөнінде бірнеше мәрте келіссөз жүргізді.
• Келісім Иранның ядролық бағдарламасын шектеуге және оған қарсы салынған санкцияларды жеңілдетуге бағытталған.

Қазіргі мәлімдеме Иранның бейбіт жолды таңдауға ұмтылысын білдірсе де, Таяу Шығыстағы геосаяси шиеленістер оны жүзеге асыруға кедергі болуы мүмкін.