Ирандағы соғыс салдарынан әлемдік мұнай қоры рекордтық деңгейде азайып жатыр
Сарапшылар Ормуз бұғазы жабық қалса, әлемде жанармай тапшылығы мен бағаның күрт өсу қаупі артатынын ескертті
Ирандағы соғысқа байланысты Парсы шығанағынан мұнай жеткізуге қойылған шектеулер аясында әлемдік мұнай қоры рекордтық қарқынмен қысқарып жатыр, деп хабарлайды Azattyq Rýhy Bloomberg-ке сілтеме жасап.
Morgan Stanley дерегіне сәйкес, 1 наурыз бен 25 сәуір аралығында әлемдегі мұнай қоры тәулігіне шамамен 4,8 миллион баррельге азайған. Агенттік мәліметінше, бұл Халықаралық энергетикалық агенттік бұрын тіркеген тоқсандық ең жоғары төмендеу көрсеткішінен де асып түскен.
Сарапшылар мұнай қорының жылдам азаюы бағаның күрт өсуіне және жанармай тапшылығына әкелуі мүмкін екенін ескертті. Әсіресе Ормуз бұғазы арқылы жеткізу жұмыстары одан әрі бұзылса, жағдай күрделене түсуі ықтимал.
«Әлемдегі көзге көрінетін мұнай қоры 2018 жылдан бергі ең төменгі деңгейге жақындап қалды», – деп мәлімдеді Goldman Sachs сарапшылары.
Сонымен қатар банк соңғы күндері Қытай тарапынан сұраныстың азаюына байланысты қорлардың қысқару қарқыны сәл баяулауы мүмкін екенін атап өтті. Қытай – әлемдегі ең ірі мұнай импорттаушы ел.
Әлемдік мұнай қорына мемлекеттердің стратегиялық резервтерімен қатар мұнай компанияларының, мұнай өңдеу зауыттарының, трейдерлер мен дистрибьюторлардың коммерциялық қорлары да кіреді.
Көп оқылған
