Иран Израильдің Ливанға соққыларына жауап ретінде Ормуз бұғазын жапты

Вашингтонмен жасалған келісімге қарамастан, Израиль әскері Ливандағы «Хезболлаға» жойқын үйлестірілген соққы жасағаннан кейін Тегеран Ормуз бұғазын қайта жабу туралы шешім қабылдады. Шабуыл салдарынан 100-ден астам адам қаза тапты, деп хабарлайды Azattyq Rýhy Euronews-ке сілтеме жасап.

Бұл туралы сәрсенбі күні Иранның мемлекеттік БАҚ-тары мәлімдеді.

Оқиға Тегеран мен Вашингтон арасындағы бір айдан астам уақытқа созылған қақтығыстарды тоқтатқан екі апталық бітім күшіне енген күні болды.

Ислам революциясы сақшылар корпусы (КСИР)мен байланысты Fars агенттігінің мәліметінше, бұған дейін сәрсенбі күні Иранның рұқсатымен екі мұнай танкері бұғаз арқылы өткен, алайда қазір қозғалыс толық тоқтатылған.

Атысты тоқтату жөніндегі келісімнің негізгі тармақтарының бірі – Иранның Ормуз арқылы кеме қозғалысын қайта жандандыруға рұқсат беруі еді. Бұл мұнай мен газ жеткізіліміндегі іркілістерді азайтып, әлем бойынша шарықтап кеткен бағаны тұрақтандыруға тиіс болған.

АҚШ президенті Дональд Трамп және Израиль премьер-министрі Биньямин Нетаньяху атысты тоқтату келісімі Ливанды қамтымайтынын мәлімдеді. Алайда келіссөздегі араағайын болған Пәкістан бұл мәлімдемені жоққа шығарды.

Ливан Денсаулық сақтау министрлігі Израиль жасаған әуе соққылары толқыны салдарынан кемінде 112 адамның қаза тауып, 837 адамның жараланғанын хабарлады.

Израиль әскері мұны қазіргі соғыстағы ең ірі үйлестірілген соққы деп атап, 10 минут ішінде Бейрутта, Ливанның оңтүстігінде және Бекаа аңғарының шығыс бөлігінде «Хезболланың» 100-ден астам нысанына соққы жасалғанын мәлімдеді.

«Израиль қарсыласының Ливанның көптеген аймақтарына, тіпті астана Бейрутқа дейін жасаған әуе соққылары 112 адамның өліміне және 837 адамның жаралануына әкелді», – делінген министрлік хабарламасында.

Израиль әскері нысана ретінде зымыран ұшыру қондырғылары, командалық орталықтар мен барлау инфрақұрылымы таңдалғанын айтты. Сонымен бірге олар «Хезболланы» бейбіт тұрғындарды «тірі қалқан» ретінде пайдаланды деп айыптады.

«Ливан мемлекеті мен оның азаматтық халқы «Хезболланың» азаматтық аудандарға орнығуына және қару әлеуетін күшейтуіне жол бермеуі тиіс», – делінген әскерилер мәлімдемесінде.

Жаңа соққылар толқыны басталар алдында «Хезболла» өкілдерінің бірі топтың Ливанда атысты тоқтатуға араағайындардың мүмкіндік табуына уақыт беріп отырғанын, алайда «израильдіктер оны сақтамай отырғандықтан, атысты тоқтатуға толық міндеттеме алмайтынын» айтқан.