Өлтіріп, 25-қабаттан секірген: Бишімбаев ісімен танылған судья күтпеген шешім шығарды

Астанада бірге тұрған әйелін өлтірді деп айыпталған ер адамға қатысты сот процесінде күтпеген бұрылыс болды. Экс-министр Қуандық Бишімбаев ісімен танылған судья Айжан Құлбаева істің материалдарын прокурорға қайтарып, жаңа сараптамалар тағайындады, деп хабарлайды Azattyq Rýhy.

Судья Айжан Құлбаева Астанада бірге тұрған әйелін өлтірді деп айыпталған Ержан Иманқұловқа қатысты қылмыстық істі прокурорға қайтарды. Сондай-ақ сот айыпталушыға өзге мамандардың қатысуымен қайта сараптамалар жүргізуді қаулы етті. Осылайша бұған дейін жасалған зерттеулерге күмән келтірілді.

Құлбаева айыпталушыға медициналық сипаттағы мәжбүрлеу шараларын қолдану мәселесін әзірге қарауға ерте екенін айтты. Оның сөзінше, іс материалдарында бір-біріне қайшы келетін сараптамалық қорытындылар бар.

Атап айтқанда, психиатриялық куәландыру актілерінің бірінде айыпталушы жарақаттың өткір кезеңінен шыққаны, өзін ретімен ұстайтыны және оған медициналық сипаттағы мәжбүрлеу шаралары қажет еместігі көрсетілген. Ал кейінірек жүргізілген кешенді сараптама оның созылмалы психикалық бұзылысы бар деген қорытындыға келген.

«Сот бұл қайшылықтар сотқа дейінгі тергеу сатысында жойылмаған деген қорытындыға келді. Сондықтан істі қосымша тергеу жүргізу және басқа сарапшылар құрамының қатысуымен қайта сараптама тағайындау үшін прокурорға қайтару қажет. Сонымен қатар айыпталушыны қарқынды бақылауы бар мамандандырылған психиатриялық ауруханаға орналастыру түріндегі қауіпсіздік шарасы өзгеріссіз қалдырылды. Сот №151 қорытынды негізді күмән туғызады деп санайды, осыған байланысты сарапшылардың өзге құрамымен қайта зерттеу жүргізу қажет», – деп түсіндірді судья.

Бүгін сотта тараптардың жарыссөзі өтті. Оның аясында мемлекеттік айыптаушы Азат Барболов ер адамды қылмыстық жауапкершіліктен босатып, оны қарқынды бақылауы бар мамандандырылған үлгідегі психиатриялық стационарға мәжбүрлі емдеуге жіберуді сұрады.

Ал жәбірленуші тарап бұл ұстаныммен келіспеді. Қаза тапқан әйелдің отбасы адвокаттары қолдағы сараптама қорытындыларындағы қайшылықтарды алға тартып, қайта сараптама жүргізуді талап етті.