Тәркіленген есірткінің қара нарықтағы құны шамамен 25 млн теңгеге бағаланған
Алматыда есірткі қылмысына қарсы іс-қимыл бөлімшесінің қызметкерлері синтетикалық есірткінің заңсыз айналымына байланысты құқыққа қайшы әрекеттің жолын кесті, деп хабарлайды Azattyq Rýhy.
Бұл туралы бүгін, 2026 жылғы 10 сәуірде оңтүстік астана полиция департаментінің баспасөз қызметі мәлімдеді.
«Екі күдікті ұсталды. Олар мінген көлікті тексеру кезінде жүксалғыштан өзіне тән иісі бар ақ түсті ұнтақ зат салынған орамдар табылды. Алдын ала мәлімет бойынша, тәркіленген зат – синтетикалық есірткі. Жалпы салмағы шамамен 1 келіні құрады. Тәркіленген партия қара нарықтағы құны шамамен 25 млн теңгеге бағаланатын мыңға жуық бір реттік дозаға тең», – делінген хабарламада.
Бұдан бөлек, көліктің ішінен қолдан өзгертілген белгілері бар кесілген мылтық және оқ-дәрілер табылып, тәркіленді.
«Аталған факті бойынша қылмыстық іс қозғалды. Сотқа дейінгі тергеу жүргізіліп жатыр», – деп мәлімдеді Алматы ПД баспасөз қызметі.
Алматы ПД Есірткі қылмысына қарсы іс-қимыл басқармасының бастығы Батуржан Абдумасаров күдіктілердің қолынан қару табылуы мұндай қылмыстардың қоғамдық қауіптілігін едәуір күшейтетінін атап өтті.