«Масқара боламыз»: Марат Оралғазин «Реалдың» Қазақстандағы жанкүйерлеріне өтініш айтты

Танымал тележүргізуші, шоумен Марат Оралғазин футбол фанаттарын Алматыда «Реал Мадридке» жанкүйер болып, әлемнің алдында масқара болмауға шақырды, деп хабарлайды Azattyq Rýhy.

Ол өтінішін әлеуметтік желідегі парақшасында жариялады.

«Достар, Алматыға «Реал Мадрид» келеді. Армандар орындалады. Мүмкін емес нәрсе жоқ. «Қайратқа» көп рахмет. Бірақ бір ескертуім бар! Сіздерден өтініш, құрметті қазақтар, ағайындар, ертең орталық стадионда «Реал Мадридке» жанкүйер болып отырмаңыздаршы. Ұят болады. Масқара боламыз. Қанша жерден «мадридтік» болсаңыздар да, қанша жерден Мбаппе, Винисиустің фанаты болсаңыздар да, өз еліңнің клубына жанкүйер болу керек. Ертең әппақ боп киініп отырмаңыздар, барлығымыз қара-сары киініп барайық. «Қайратқа» бірауыздан қолдау көрсетейік. Бұл ерекше мүмкіндік. Барлығымыздың балалық арманымызды жүзеге асырып жатқан Қайратқа көп рахмет», - деді шоумен.

Еске сала кетейік, 27 тамызда «Қайрат» Алматыда Чемпиондар лигасының плей-офф кезеңінің қарымта матчында шотландиялық «Селтикті» пенальти сериясында 3-2 есебімен жеңіп, Чемпиондар лигасының негізгі кезеңіне өткен болатын. «Қайраттың» 21 жастағы қақпашысы Темірлан Анарбеков 120 минут гол жібермей, үш пенальтиді қайтарды.

Артынша Монакода UEFA Чемпиондар лигасының жеребе тарту рәсімі өтті. «Қайрат» футбол командасы өз алаңында «Реал Мадрид», «Брюгге», «Олимпиакос» және «Пафос» клубтарымен ойнайды. Ал сырт алаңда «Интер», «Арсенал», «Спортинг» және «Копенгагенмен» кездеседі.