Ернұр Батырғали кадеттер арасында әлем чемпионы атанды

Қазақстан құрамасы дзюдодан Софияда (Болгария) өтіп жатқан кадеттер арасындағы әлем чемпионатында алғашқы алтын медалін жеңіп алды, деп хабарлайды Azattyq Rýhy.

Ұлттық Олимпиадалық комитеттің мәліметінше Ернұр Батырғали Қазақстан құрамасының қоржынына алғашқы алтын медальді салды.

«Дзюдошы 60 келіге дейінгі салмақта үздік атанды. Шешуші кездесуде Батырғали Тәжікстан құрамасының өкілі Лоик Кудбудиновты жеңді», - деп жазылған хабарламада.

Айта кетері, бұған дейін әлем чемпионатында Арман Мыса (50 келіге дейін) үшінші орын алған еді. Ал Мұхаммедәлі Жылқайдар Софияда финалда жеңіліп қалды. Ресей спортшысы Рахим Хамхоевке жол беріп, күміс жүлдеге ие болды. Сол салмақ дәрежесінде Ролан Қайрғали канадалық Анечка Матиды жеңіп, жеңіс тұғырының үшінші сатысына көтерілді. Осылайша, ұлттық құрама қоржынында төрт жүлде бар.

Еске сала кетейік, Германияда өткен  2025 жылғы Универсиадада Қазақстан құрамасы дзюдодан екі медаль жеңіп алды. Финалдық кезеңге екі қазақстандық спортшы жолдама алып, нәтижесінде үшінші орыннан көрінді.

60 келіге дейінгі салмақ дәрежесінде Аман Бақытжан қола медаль үшін өткен белдесуде грузиялық Лука Модебадзені жеңді. Ал 66 келіге дейінгі салмақта Нұрқанат Серікбаев украиналық Микита Холобородькодан басым түсті.