Әшімбаев Қазақстан паралимпиадашыларының ерекше суреттерін жариялады

ҚР Сенат төрағасы Мәулен Әшімбаев Парижде өтіп жатқан Паралимпиада спортшыларын жеңісімен құттықтап, көк туымызды желбіреткен жігіттердің фотоларын әлеуметтік желіге жүктеді, деп хабарлайды Azattyq Rýhy.

«Франция астанасынан екі бірдей сүйінші жаңалық келіп жетті. Париж паралимпиадасында пауэрлифтингтен 54 келі салмақ дәрежесінде ел намысын қорғаған параспортшымыз Давид Дегтярев алтын жүлдеге қол жеткізді. Давид Токио паралимпиадасында да жеңіс тұғырының ең биік сатысынан көрінген еді. Атлетіміз осы жолы да өз салмағында әлемнің үздігі екенін дәлелдеп, екі дүркін Паралимпиада чемпионы атанып отыр», - деді Сенат төрағасы.

Ол бұл – тұтас қазақ спорты үшін үлкен жетістік екенін атап өтті.

«Сонымен қатар ядро лақтырудан F36 санатында бақ сынаған отандасымыз Дастан Мұқашбеков 16 метр көрсеткішпен қоржынға қола медаль салды. Қазақ пара жеңіл атлетикасы үшін бұл – Паралимпиада ойындарындағы алғашқы жүлде. Дастан өз нәтижесімен Азия рекордын жаңартқанын да атап өткен жөн. Сондықтан бүгін параспортшыларымыз бағындырған белестерді тарихи жеңіс деуге толық негіз бар. Осы жарқын жеңіспен атлеттерімізді және баршаңызды шын жүректен құттықтаймын! Көк туымыз биікте желбірей берсін! Алға, Қазақстан!», - деп жазды Мәулен Әшімбаев.

Айта кетсек, бұған дейін Президент Қасым-Жомарт Тоқаев Паралимпиада ойындарының екі дүркін чемпионы Давид Дегтяревті құттықтады.