Головкин Альвареспен жұдырықтасқаннан кейін кіммен жекпе-жек өткізуі мүмкін?

Azattyq Rýhy

Қазақстандық боксшының бапкері бұл сұраққа жауап берді

Головкин Альвареспен жұдырықтасқаннан кейін кіммен жекпе-жек өткізуі мүмкін?

Орта салмақта әлем чемпионы Геннадий Головкиннің бапкері Джонатон Бэнкс шәкіртінің Альварестен кейін екі салмақ дәрежесіндегі бұрынғы титул иегері британиялық Крис Юбэнкпен жекпе-жек өткізуге қарсы емес екенін мәлімдеді, деп хабарлайды Sports.kz.

Оның айтуынша, мұндай жекпе-жек Геннадийдің кездесуін ұйымдастыруға жауапты адамдар үшін қызықты болмақ.

«Геннадий екеуміз бұл тақырыпты талқылаған емеспіз. Бірақ оның ісін жүргізетіндер мұндай жекпе-жек туралы ойымды сұрады. Мен болсам бұл керемет жекпе-жек болар еді деп жауап бердім. Олар: «Егер біз осы жекпе-жекті ұйымдастыра алсақ, сен қолдайсың ба деп сұрады. Мен әлбетте дедім. Бұл шынымен керемет жекпе-жек болар еді. Крис Юбэнкпен қарсыласу кез-келген боксшы үшін қиын болады. Ол мықты боксшы, маған ұнайды. Бокс жанкүйері ретінде бұл жекпе-жектің керемет боларына сенімдімін», - деді Behind The Gloves-ке берген сұхбатында.

Айта кетейік, 17 қыркүйек күні Головкин мексикалық Сауль Альвареспен үшінші жекпе-жек өткізеді. БАҚ өкілдеріне берген сұхбатында GGG «Канеломен» трилогияның нәтижесіне қарамастан орта салмақта WBA Super, IBF және IBO титулдарының иегері болып қалатынын айтты.

×
Бұл желілік ресурстың ақпараттық өнімдері 18 жастан асқан адамдарға арналған.