Аймақта Партиялық бақылау комитетінің көшпелі отырысы өтті
«AMANAT» партиясының Сайлауалды бағдарламасы аясында Павлодар облысында 8 мектептің құрылысы аяқталды, шамамен 960 шақырым жол жөнделіп, қайта жаңғыртылды, 27 елді мекенге орталықтандырылған су тартылды және басқа да жұмыстар атқарылды, деп хабарлайды Azattyq Rýhy партияның баспасөз қызметіне сілтеме жасай отырып.
Өңірде партияның сайлауалды уәделерінің тиімді орындалуы «AMANAT» партиясының Партиялық бақылау комитетінің көшпелі отырысында талқыланды.
Елеулі жетістіктерге қарамастан, қордаланған мәселелер де жоқ емес: жобалық-сметалық құжаттаманың кешігуі, мердігерлердің салғырттығы, формалды бақылау, мерзімінде аяқталмаған әлеуметтік нысандардың құрылысы және тағы басқалар. Партияластар өкілеттік мерзімнің орта тұсы келгенін және саяси таңдау жасау мәселесі тұрғанын мәлімдеді: тәртіпті дәл қазір қалпына келтіру керек немесе өкілеттік мерзім кезеңінің соңында сайлаушылардың сенімінен айрылып қалу қаупі бар.
Комитет төрағасы, Мәжілістегі «AMANAT» фракциясы төрағасының орынбасары Павел Казанцев талқылаудың өзектілігін бірден анықтап, партияның сайлауалды бағдарламасы Ұлттық даму жоспарына енгізілгенін еске салды.
«Біздің бағдарламамыз – науқандық парақша емес, мемлекеттің стратегиялық құжаты. Каденция ортасында рәсімдерді, мердігерлер немесе түрлі жағдайларды сылтау етуге болмайды. Әрбір тармақ, әрбір мерзім – министрдің, әкімнің, депутаттың жеке жауапкершілігі. Егер біреу қызығушылығын жоғалтып, партиялық бақылауды тек плакатқа айналдырса – ондай адаммен қоштасамыз: біздің қатарымызда міндеттемелерді соңына дейін жеткізетіндер бар. 2027 жылы ақталып отырмау үшін тиісті түзетулерді қазір орындау керек. Бір құмалақ бір қарын майды шірітеді», – деп атап өтті ол.
«AMANAT» партиясының Хатшысы Ержан Жылқыбаев та бұл отырыстың барлық өңірлер үшін маңызды екенін атап өтті: партиялық бақылау қатаң әрі әділ болуға тиіс, формалдылыққа жол берілмейді.
«Біз бәрін айқын көріп отырмыз. Депутаттар хаттама үшін есеп берумен шектелген кезде нәтиже болмайды. Ал егер табандылық танытып, күн сайын бақылап отырса, ең күрделі деген нысандардың құрылысы қайта жанданады. Партия – жай ғана әуесқойлар клубы емес, өзгерістердің құралы. Депутаттар мен әкімдер мәртебесі – халықтың сенімі, ол үшін жеке жауапкершілік бар. Егер біреу сол сенімнен айырылса, біз оның атын сақтап қалуға тырыспаймыз», – деді ол.
Павлодар облысының әкімі Асайын Байханов атқарылған жұмыстардың нәтижелерімен бөлісті. Оның айтуынша, үш жылда жылу энергетикасына 163 млрд теңгеден астам қаржы салынды, 87 бірлік желілік жабдық жөнделді және 185 шақырымнан астам жылу желісі қайта жаңғыртылды. Өңір басшысы аймақ жаңа жылыту маусымына дайын екенін айтты. Жыл соңына дейін сапалы ауыз суға қолжетімділік 100%-ға жеткізіледі; жол құрылысында 590 шақырым асфальт төселгеннен кейін нормативтік жағдайдағы жолдардың үлесі 96%-ға жетеді. Сондай-ақ биыл төрт жаңа мектеп ашылады.
«Біз моноэкономикадан индустриалды-аграрлық үлгіге біртіндеп көшудеміз. Мектеп тапшылығының жойылғанын жай сөзбен ғана емес, нақты нысандардың құрылысымен дәлелдедік. Иә, тұралап қалған құрылыстар бар, ол жасырын емес. Келісімшарттар бұзылып, жаңа мердігерлер тағайындалды, қазан айына дейін қатаң бақылау болады. Республикалық деңгейде келісімді қажет ететін жерлерде Мәжіліс фракциясынан қолдау сұраймыз. Жергілікті бюджеттен бөлінген міндеттемелерді толық орындап отырмыз: қаржыға байланысты ешбір жоба кейінге қалдырылған жоқ. Бізге қағаздағы құр сандар емес, адамдарға пайдасы тиетін шынайы нәтиже маңызды. Сол үшін KPI-ды өзгертуге рұқсат берулеріңізді сұраймыз. Басты мақсат – халықтың мәселесін шешу және оларға қолайлы жағдай жасау», – деді өңір басшысы.
Комитет мүшесі Арман Евниев негізгі сараптаманы баяндады. Ол жүйедегі негізгі олқылықтарды атап өтті: мердігерді іріктеу мен бақылаудағы салғырттық, жоспарлаудың сапасыздығы, жұмысты қайта-қайта түзету, партиялық бақылаудың қағаз жүзінде қалып қоюы және депутаттардың бюджет мәселесінде белсенділік танытпауы.
«Қаржы жетпей жатыр деп жүргеннің көбі – шын мәнінде дұрыс дайындықтың жоқтығынан. Жобалық-сметалық құжаттаманың кешігуі, әлсіз негіздемелер, сараптамалардың уақытында өтпеуі – осының бәрі себеп. Бұл мәселені қағазбен емес, нақты жобалық басқарумен шешу керек. Яғни әр тармақты жүздеген нақты қадамға бөліп, апта сайын жауапты адамдарын белгілеп отыру қажет. Павлодардағы жобалық кеңсе мұндай процесті дашборд режимде жүргізе алады, сондықтан соны қосып, партиялық бақылау бекеттерін жай баннермен емес, адамдармен күшейткен жөн. Сонымен қатар жауапкершілік те керек: егер орындаушы мерзімнен кешіккеніне селт етпесе, тәртіп болмайды. Бірақ тек жазалау емес, ынталандыру да қажет – жұмысты сапалы әрі уақытында атқарғандарды көпшілік алдында марапаттау керек. Сонда мәселе формалды отырыстан гөрі күнделікті нәтижеге бағытталған басқаруға ауысады», - деді ол.
Арман Евниевтің айтуынша, Железин ауданы Мыңкөл ауылындағы медициналық пункттің құрылысы аяқталғанымен, нысан әлі пайдалануға берілмеген. Ал Павлодар ауданы Кеменгер ауылындағы дене шынықтыру-сауықтыру кешенінің құрылысы мердігердің жауапсыздығына байланысты тоқтап тұр. Сондай-ақ Павлодар қаласы мен Екібастұздың Солнечный кентіндегі өрт сөндіру деполарында жобада жіберілген қателіктер мен ұзаққа созылған келісімдердің салдарынан әлі құрылыс жұмыстары басталмаған.
«AMANAT» партиясының Павлодар облыстық филиалы мен облыстық мәслихат төрағасы Илья Теренченконың айтуынша, 2024 жылы бағдарламаға енгізілген 81 тармақтың 64-і (78%) орындалған. Ал биылғы қаңтар-шілде айларында 17 тармақ жүзеге асырылып, тағы 53-і жұмыс кезеңінде тұр. Проблемалық нысандарға қатысты мердігерлермен бірлескен жұмыс топтары құрылды және 33 партиялық бақылау бекеті тұрақты жұмыс істеп тұр. Мәселен, Ақсу қаласындағы Мұз сарайының құрылысы аяқталды, облыс бойынша 26 медициналық нысан, 8 спорт мекемесі, 2 мәдениет үйі ашылды. Сондай-ақ Павлодар мен Екібастұзда қоғамдық көлік паркі 88 автобуспен толықты.
«Біз енді жекелеген тексерістерден тұрақты бақылау жүйесіне өттік. Әрбір проблемалық нысан бойынша толықтай жоспар жасалып, апта сайынғы нәтижелер мен фотоесептер ұсынылады. Негізгі басымдық – әлеуметтік нысандардың құрылысын аяқтау, оқушы орындарының тапшылығын жою, халықты сумен және медициналық қызметпен қамту. Бұл бағытта бізді әкімдік те, Мәжіліс фракциясы да қолдайды. Басты мақсатымыз – халық сенім артқан мәселелерді түбегейлі шешу», – деді ол.
Жиын қорытындысы бойынша барлық деңгейдегі басшылардың жеке жауапкершілігін күшейту, түзетулердің ашықтығын қамтамасыз ету, партиялық бақылау бекеттерінің жұмысын, әсіресе, Бастауыш партия ұйымдарының қатысуымен жандандыру, сондай-ақ проблемалық жағдайлар жөніндегі мәліметті Орталық аппаратқа уақытылы жеткізу тапсырылды.
Сонымен қатар Партиялық бақылау комитеті бірқатар лауазымды тұлғаға сөгіс жариялады. Атап айтқанда, облыстық денсаулық сақтау басқармасының басшысы Иран Шаметеков пен құрылыс басқармасының басшысы Асқар Ажмұрат медициналық нысандардың құрылыс мерзімін кешіктіргені және мердігерлерге тиісті бақылау орнатпағаны үшін тәртіптік жазаға тартылды. Осындай шаралар түрлі деңгейдегі мәслихат депутаттарына да қолданылды.