Елбасының бұл сынақты да жеңіл еңсеретініне толық сенімдімін – Бауыржан Байбек

«Елбасы – терең парасат пен асқақ рухтың ғана емес, мықты денсаулықтың да иесі» деген «Nur Otan» партиясы Төрағасының бірінші орынбасары Бауыржан Байбек оның ауруынан тез айығып кетуін тіледі.

Айта кетейік, бүгін Нұрсұлтан Назарбаевтың COVID-19 вирусын жұқтырып алғанын баспасөз хатшысы Айдос Үкібай Twitter-де мәлімдеді. Бауыржан Байбек бұл хабар көпшіліктің көңілін жабырқатқанын айтты.

«Өмірдің талай аумалы-төкпелі өткелдерінен сүрінбей өтіп, қабырғалы қалың елін өркениет өріне бастап келе жатқан Елбасының бұл сынақты да жеңіл еңсеретініне толық сенімдімін. Бұған менің ұзақ жылдар Елбасының қасында тығыз жұмыс істеп, тағлымын алып келе жатқан жан ретінде толық көзім жетеді. Елбасы – терең парасат пен асқақ рухтың ғана емес, мықты денсаулықтың да иесі. Жұмыс кестесінің тығыздығына қарамастан, саламатты өмір салтын ұстанып, тұрақты түрде спортпен шұғылданғанына талай куә болдым», - деп жазды Б. Байбек өзінің Facebook-парақшасында.

Ол сондай-ақ, Елбасының тезірек сауығып кетуін тіледі.