Қазақстандықтар енді жеке куәлігін үйден шықпай-ақ онлайн ауыстыра алады

Биылдан бастап Қазақстанда жеке куәлікті Халыққа қызмет көрсету орталығына бармай-ақ онлайн ауыстыруға болады. Бұл туралы цифрлық даму, инновациялар және аэроғарыш өнеркәсібі министрі Жаслан Мәдиев мәлімдеді, деп хабарлайды Azattyq Rýhy.

«Ең сұранысқа ие қызметтердің бірі — жеке куәлікті ауыстыру. Бұрын азаматтар Халыққа қызмет көрсету орталығына келіп, фото түсіріп, кезекте ұзақ тұруға мәжбүр болатын. Айдың соңына дейін бұл процесс толығымен онлайн форматқа көшіріледі. Біз процестерді сәтті сынақтан өткіздік және фотосуреттің талаптарға сәйкестігін маманның орнына AI-модель бағалайтын жүйені оқытуды аяқтап жатырмыз», - деді Мәдиев Үкіметтің отырысында.

Министрдің айтуынша, жеке куәлікті онлайн ауыстыру процесі барынша қарапайым. Азаматтар идентификациядан өтіп, фото мен қолтаңбаны жүктейді, сосын онлайн төлем жасап, құжат дайын болғаны туралы SMS-ті күтеді. Осылайша ешқандай кезексіз, үйден шықпай құжатын ауыстыра алады.

Мәдиев бұл сервис шамамен 1 миллион азаматтың Халыққа қызмет көрсету орталығына бару қажеттілігін жоятынын атап өтті.