Қазақстанда балаларға ғана арналған SIM-карталар пайда болуы мүмкін
Бұл туралы оқу-ағарту вице-министрі мәлім етті
2023-2025 жылдарға арналған Балаларды зорлық-зомбылықтан қорғау, суицидтің алдын алу және олардың құқықтарын қорғау жөніндегі кешенді жоспар аясында оқу-ағарту балаларға ғана арналған SIM-карта шығаруды ұсынып отыр, деп хабарлайды Azattyq Rýhy.
Бұл туралы бүгін орталық коммуникациялар қызметінің алаңында өткен баспасөз конференциясында оқу-ағарту вице-министрі Еділ Оспан мәлім етті.
«Халықаралық тәжірибе көрсеткендей, балаларға арналған SIM-карталар байланыс операторлары тарапынан қолдау тауып, цифрлық қауіпсіздік саласындағы мемлекеттік бастамалармен қатар жүреді. Бұл ата-аналарға балалардың телефонды қолдануын тиімді бақылауға мүмкіндік береді. Министрліктің бұл бастамасы балалардың интернеттегі қауіпсіздігін күшейтіп, ата-аналарға олардың онлайн кеңістіктегі қорғанысын қамтамасыз етуде жоғары деңгейдегі қолдау көрсетеді», – дейді Еділ Оспан.
