Риддер мен Алтайдағы кен орындарының 4400 жұмысшысы далада қалуы мүмкін

Риддер мен Алтай қаласындағы кен орындары жабылу алдында тұр. «Тишинский» мен «Малеев» кеніші жұмысын тоқтатса, 4 мыңнан астам қызметкер нәпақасынан айырылуы мүмкін. Бұл мәселені Мәжіліс отырысында депутат, «AMANAT» партиясы фракциясының мүшесі Ұлықбек Тұмашинов көтерді, деп хабарлайды Azattyq Rýhy.

Ұлықбек Тұмашинов қаңтар айында Риддер мен Алтай қаласының белсенділерімен жолығып, «Қазмырыш» ЖШС филиалында туындаған проблемалармен танысқан.

«Кеніштердегі өндіріс тоқтау сатысында тұр, бұл өз кезегінде жұмыс орындарының қысқаруына әкеп соғады. Оған себеп болған жағдайдың бірі - қорғасын мен мырышқа пайдалы қазбаларды өндіруге салынатын салық ставкаларының ұлғаюы. Осылайша қорғасын мен мырыштың тартымдылығы мен тиімділігі басқа металдарды барлау және өндірумен салыстырғанда төмендейді», - деді ол.

Депутаттың айтуынша, алтын өндіруге салынатын салық мырыш пен қорғасын салығынан бір жарым есе көп.

«2022 жылдан бастап мырыш бағасы 14%-ға, қорғасын бағасы 11%-ға төмендеді. Мырыш бойынша қорларды толықтыру коэффициенті - 0,1; қорғасын бойынша - 0,2», - деп атап өтті ол.

Ұлықбек Тұмашиновтың айтуынша, осы себепті Қызылорда облысындағы «Шалқия» кен орнында мырыш өндірісі басталмай тұр.

«Риддер мен Алтай қалалары Арқалықтың кебін киюі мүмкін. Арқалықта тау-кен өндірісі шегіне жетіп, қаланың негізі болған кәсіпорындар жабылып, жұмыс орындары құрылмай, жақсы кадрлар кетіп қалды», - дейді ол.

Депутат моноқалалардың мәселесін шешудің бірнеше жолын ұсынды:

• Мырыш пен қорғасын өндіруге салынатын салық ставкаларын 6,5%-ға дейін төмендетуді қарастыру. Бұл ретте пайдалы қазбаларды өндіруге салынатын салық ставкалары бойынша түсімдердің алынбаған көлемі «Шалқия» кен орнынан түсетін өзге де салық түсімдерінің 22 млрд теңгеге дейін өсуімен өтелетін болады және жұмыс істеп тұрған кәсіпорындар бойынша бюджетке салықтар бойынша түсімдер азайтылмайды.
• «Қазмырыш» АҚ ШҚО-ның осы кен орындары бойынша өндіру мерзімін ұзартуға міндеттеме алуы тиіс: Риддер және Алтай қалаларының маңында геологиялық барлау жұмыстарын жүргізу қажет, бұл жерлерде 30 жыл бойы барлау жұмыстары жүргізілмеген.
• Риддер және Алтай моноқалаларында Қарағанды облысының Саран қаласының тәжірибесі қолданылып, шұғыл түрде жаңа өндірістерді ұйымдастыруды бастау қажет: ағаш өңдеу, құрылыс индустриясы, машина жасау, туризм сияқты салалар қолға алыну керек.