Балабақшасы - 5,2 млн, бастауыш сыныбы - 12,5 млн теңге: Астанадағы жаңа мектептің оқу ақысы қандай

Астанада ашылып жатқан Kazakhstan International School Astana (KIS Astana) мектебі балаларды екі жастан бастап, 12-сыныпқа дейін оқытады. Осы ретте Azattyq Rýhy тілшісі Астанада ашылып жатқан тағы бір халықаралық мектептің оқу ақысы қанша екенін анықтап көрді.

Оқу ошағының ресми сайтындағы ақпарат бойынша, мұнда мектепке дейінгі білім беру мен бастауыш сыныптары бар.

Мектепке дейінгі білім беру бағдарламасына баланы 2 жастан бастап қабылдайды. 2 жастағы балаға жылына – 5 млн 240 мың теңге, 3 жастағы балаға – 5 млн 764 мың теңге, 4 жастан бастап – 7 млн 599 мың теңге, 5 жастан бастап – 10 млн 481 мың теңге төлейсіз.

Бастауыш сыныптар бойынша: 1-2 сынып оқушысына жылына 11 млн 529 мың теңге, 3-5 сынып оқушысына – 12 млн 577 мың теңге төлейсіз.

Бұл мектепте жергілікті мұғалімдермен қатар, Канада, АҚШ, Ұлыбритания, Ирландия, Австралиядан келген мұғалімдер сабақ береді.

Kazakhstan International School алғашқы мектебі 25 жыл бұрын Алматыда құрылған. Мектептің Астанадағы кампусы 2024 жылы 2 қыркүйекте ашылған.

Алматыдағы халықаралық мектеп 2 жастан 19 жасқа дейінгі балаларға білім беруді қамтиды. Оның да бағасы елордадағы оқу ошағымен шамалас. 6-8 сынып оқушысының оқу ақысы бір жылға 11 млн 791 мың теңге болса, 9-10 сынып оқушысы үшін – 11 млн 660 мың теңге, 11 -12 сынып оқушысы үшін 13 млн 887 мың теңге тұрады.

Мектеп халықаралық бакалавриат (IB) аккредитациясынан өткен. Бұл беделді бағдарлама үш бағытты қамтиды. Атап айтқанда, 5-тен 10 жасқа дейінгі балаларға арналған бастауыш (Primary Years Programme, PYP), 11-ден 16 жасқа дейінгі балаларға есептелген орта (Middle Years Programme, MYP) және 16-19 жас аралығындағы ересек оқушыларға бейімдеген дипломдық оқу бағдарламасы (Diploma Programme, IB) бар.

Айта кетейік, бүгін президент Қасым-Жомарт Тоқаев Астанадағы осы мектепті аралап көрген еді.