«Қызметтік баспананы өз атына аударғысы келген»: ШҚО-да мемлекеттік қызметкер әкімді сотқа берді

Шығыс Қазақстан облысында қызметтік тұрғын үйді өз атына аударып алғысы келген мемлекеттік қызметкер аудан әкімін сотқа берді, деп хабарлайды Azattyq Rýhy.

ШҚО мамандандырылған ауданаралық әкімшілік соты баспасөз қызметінің мәліметінше, мемлекеттік қызметкер әкімнің пәтерді жекешелендіруден бас тарту туралы шешімімен келіспей, сотқа шағым түсірген. 

Әкім бас тарту себебін қызметтік пәтер баланста тұрған мемлекеттік орган мен қызметкердің арасында еңбек келісімшарты жоқтығынан деп түсіндірген. Ал талапкер мемлекеттік қызметтегі тәжірибесі барын және экологиялық апат аймағында тұрған адам ретінде бұл пәтерді жекешелендіру құқығына ие екендігін жеткізген.

«Талапкердің жалпы еңбек өтілі – 40 жыл, оның ішінде мемлекеттік қызметтегі өтілі – 35 жыл. «Тұрғын үй қатынастары туралы» заңға сәйкес, егер адамның мұндай тәжірибесі болса және атында үйі болмаса онда қызметтік пәтерді жекешелендіруге құқылы», - делінген сот хабарламасында.

Сот мемлекеттік қызметкердің талап-арызын қанағаттандырды.

Үкім әлі заңды күшіне енген жоқ.