Ақмола облысында әлеуметтік желі арқылы есірткі саудасымен айналысқан қылмыстық топ сотталды

2022 жылдың маусым айында Астана, Көкшетау және Қарағанды қалаларында ұйымдасқан қылмыстық топ есірткі заттарын тарату мақсатында өз қызметін бастаған. Қылмыстық топтың басында М. есімді азамат тұрған. Оның басшылығымен құрылған топ құрамында сегіз адам түрлі рөлдерді атқарған, соның ішінде «үйлестіруші, куратор, кассир, курьер, қоймашы және кепілгер» сынды қызметтер болған, деп хабарлайды Azattyq Rýhy облыстық соттың баспасөз қызметіне сілтеме жасап.

М. әлеуметтік желілер арқылы есірткі саудасын бақылауда ұстап, топтың жұмысын үйлестірген. «Кураторлар» С., Я. және Т. әлеуметтік желі арқылы есірткі сатып алушыларға нұсқаулық беріп, жасырын орындарды көрсеткен, ал курьерлерді жұмысқа тартумен айналысқан. «Қоймашылар» Қ., Т., К., Ш. есірткі заттарын орап, оларды әртүрлі қалаларға орналастырған.

М.-ға Қазақстан Республикасы Қылмыстық кодексінің 262-бабының 1-бөлігі (қылмыстық топты басқару) және 296-бабының 3-бөлігі (психотроптық заттарды сақтау) бойынша айып тағылды. Сонымен қатар, қылмыстық топ мүшелері аса ірі мөлшерде есірткі заттарын бірнеше рет сату, сақтау, тасымалдау және өткізу қылмыстарына қатысқан. Олар әлеуметтік желі мен басқа да ақпараттық ресурстарды пайдалана отырып, есірткі саудасын жүргізген.

Ю. есімді азамат кәмелетке толмаған Т.-ны ауыр қылмыс жасауға тартты, ал Т. өз кезегінде есірткі сатуға қатысты. Бұдан бөлек, қылмыстық топ мүшелері жәбірленушінің денсаулығына зиян келтірмей, оның ұялы телефонын ұрлаған.

«Сотталғандардың кінәсі жасырын тергеу әрекеттері мен сараптама қорытындылары арқылы расталды. Құқық қорғау органдары Астана, Көкшетау және Қарағанды қалаларындағы оқиға орындарында есірткі заттарын тауып, тергеу барысында жеткілікті дәлелдемелер жинаған.Сот үкіміне сәйкес, қылмыстық топтың жетекшісі М.-ға 16 жылға бас бостандығынан айыру жазасы тағайындалды, ал оның серіктестері С., Т., Қ., Я., Ш., К. әрқайсысы 15 жыл 6 айға сотталды. Ю. кәмелетке толмағандармен жұмыс істеу құқығынан өмір бойына айырылып, 11 жылға сотталды. Басқа топ мүшелері де түрлі мерзімдерге бас бостандығынан айырылды», - делінген хабарламада.

Сот үкімі әлі заңды күшіне енген жоқ.