Ақсуда жалған оқу куәлігін берген ұйым басшысы бір жарым жылға сотталды
Ол оқудан өткені туралы куәлік бергені үшін заңсыз ақша қаражатын алған
Павлодар облысында жалған оқу куәлігін берген ұйым басшысы жазаланды. Бұл туралы өңірдегі Экономикалық тергеу департаментінің баспасөз қызметінен мәлім етті, деп хабарлайды Azattyq Rýhy.
Павлодар облысы бойынша Экономикалық тергеу департаменті қызметкерлері коммерциялық сатып алу фактісінің жолын кесті.
«Ақсу қаласындағы бір кәсіпорынның басшысы «Электро-газбен дәнекерлеуші» мамандығы бойынша оқудан өткені туралы куәлік бергені үшін коммерциялық сатып алу ретінде заңсыз ақша қаражатын алған. Бұл ретте оқыту іс жүзінде жүргізілмей, құжаттар формальды түрде рәсімделгені белгілі болды. Бұл мамандық құрылыстан бастап мұнай өндіруге дейін бірқатар саланың негізінде жатқандықтан, оқытусыз сертификат беру халық үшін зор қауіп тудырады», - делінген хабарламада.
Ақсу қалалық сотының үкімімен ұйым басшысы кінәлі деп танылып, оған оқыту-білім беру қызметімен байланысты коммерциялық ұйымдарда басшы лауазымдарды атқару құқығынан 2 жылға айыра отырып, 1 жыл 6 ай мерзімге бас бостандығын шектеу жазасы тағайындалды.
