Тараздықтардан 60 млн теңге ұрлап кеткен банк қызметкері Ресейден экстрадицияланды (ВИДЕО)
Күдікті 2019-22 жылдары Таразда қаласындағы банк филиалында жұмыс істеген
Бас прокуратура аса ірі көлемде алаяқтық жасағаны үшін қылмыстық жауапкершілікке тарту мақсатында Қазақстан азаматын Ресей Федерациясынан экстрадициялады, деп хабарлайды Azattyq Rýhy.
2019-2022 жылдар аралығында күдікті Тараз қаласындағы банк филиалында жұмыс істеп, банк клиенттерінің атынан оларға несие рәсімдеген.
«Әрі қарай банк клиенттерінің шоттарына қол жеткізген күдікті несие қаражатын достарының есепшотына аударып, кейін оны қолма-қол ақшаға айналдырған. Қылмыстық әрекеттер нәтижесінде банк клиенттеріне 60 млн теңге көлемінде залал келтірілген», - деп хабарлады Бас прокуратура.
Қылмыс жасағаннан кейін ол жасырынып қалған, сондықтан халықаралық іздеу жарияланды.
2024 жылдың сәуір айында фигурант Краснодар өлкесінің аумағында ұсталды, содан кейін ол ҚР Бас прокуратурасының сұрауы бойынша Қазақстанға экстрадицияланды.
Қазіргі уақытта күдікті уақытша ұстау изоляторына қамалды.
Айыпталған қылмысты жасағаны үшін мүлкі тәркіленіп, бес жылдан он жылға дейінгі мерзімге бас бостандығынан айыру жазасы қарастырылған.
Айта кетейік, осы жылы қылмыстық әрекеттері 350-ден астам жәбірленушіге жалпы сомасы 7 миллиард теңгеге жуық шығын келтірген алаяқтық жасағаны үшін іздеуде жүрген 11 адам Ресейден Қазақстанға экстрадицияланды.
