«159 млн теңгені жымқырды»: теміржол станциясы бейнебақылау жүйесінсіз қалды
Үш адам сотталды
159 миллион теңгені жымқырғаны үшін 29 шілде күні Астана қаласы қылмыстық істер жөніндегі ауданаралық сотында үш лауазымды тұлғаға қатысты үкім шықты, деп хабарлайды Azattyq Rýhy.
Сотталғандар – «Әскерилендірілген темір жол күзеті» ЖШС бас директоры Б. Наханов, оның орынбасары А. Мұқатаева және ЖШС бас менеджері Р. Сыдықов.
Олар теміржол станциялары үшін бейнебақылау жабдықтарын сатып алу және монтаждау бойынша аффилиирленген компаниялармен шарттар жасасу жолымен өздеріне сеніп тапсырылған 159 млн теңгеден астам қаражатты ұрлаған. Бұл айыптаумен дәлелденді.
«Сыдықовтың рөлі бақылаудағы кәсіпкерлерді табу және бейнебақылау жүйелерін өз бетінше орнату болды. Наханов пен Мұқатаева қабылдау актілеріне қол қойып, айқын бұзушылықтарға қарамастан мердігерлерге төлем жасаған.
Олар 7 жылдан 8 жылға дейін әр түрлі мерзімге бас бостандығынан айырылды», - делінген хабарламада.
Сотталғандардан келтірілген шығын өндірілді.
Аса ірі көлемде қаржы жымқырғаны үшін айыптау үкімі заңды күшіне енді.
