Оның үйін аймақтағы бала құқықтары жөніндегі уәкіл көрсетті
Павлодар облысы бойынша бала құқықтары жөніндегі аймақтық уәкіл Сәуле Шәкенова небары 12 жасында босанған қыздың үйіне барып, ата-анасымен танысқан. Шакенова жариялаған суреттер адамның денесін түршіктіреді, деп жазады Azattyq Rýhy.
Сәуле Шәкенова өзінің туысынан зорлық көріп, босанған 12 жасар қыздың ауылына барған. Қыз бала отбасымен Павлодар облысы Шарбақты ауданы Галкино ауылында өмір сүріп жатыр. Атажұртқа көшіп келген қандастарды Қазақстанға ерте көшіп келген туыстары осы ауылға қоныстандырған көрінеді.
«12 жасында ана атанған қыздың шешесі не жаза алмайды, не оқи алмайды. Ал, әкесі 6-сыныпқа дейін білім алған. Қазақстанға көшіп келгенде мектептің пешін жағатын адам болып жұмысқа орналасқан. Бірақ, қазір жұмыссыз», - деп жазды Шәкенова.
Сәуле Шәкенова бұл отбасының қазір тұрып жатқан үйін түгел суретке түсіріп алған. Отбасының тұрмысы өте нашар екені анық байқалады, үйіндегі жиһаздар өте ескі, лампа жоқ, пеші құлағалы тұр. Сынық терезесінің жанындағы ескі диванда осы үйдің тағы бір бүлдіршіні екі бүктелген күйінде жатыр...
«Қыздарының аяғы ауыр болуы мүмкін деген ақпаратты ата-анасы 2024 жылдың 3 сәуірінде мектептің мұғалімдерінен естіген. Дәл сол күні ата-анасының рұқсатымен қыз баланы дәрігер қарап, аяғы ауыр екенін растаған. Оқушы қыз жедел түрде аудандық ауруханаға түсіп, 2024 жылдың 19 шілдесіне дейін сонда жатқан. Үш ай ауруханада жатқанда бала онлайн түрде оқыған. Оқушы салмағы 3360 грамм, дені сап-сау қыз бала туған», - деп жазады Шәкенова.
Перзентханадан шыққаннан кейін 12 жасар қыз бен оның сәбиі қайда баратыны әлі белгісіз. Бірақ, Шәкенова бұл проблема қазір шешіліп жатқанын айтты.
«Қыздарының зорланғанын анасы да, әкесі де білмеген. Қазір зорлық көрсетті деген туысының отбасымен қарым-қатынасты үздік деп отыр. Метеп әкімшілігі оқушының зорлыққа ұшырағаны туралы ақпаратты жедел түрде құқық қорғау органдарына берген», - деп жазды Шәкенова.
Естеріңізге сала кетейік, Павлодар облысы Шарбақты ауданында 12 жастағы оқушы қыз туысынан зорлық көріп, аяғы ауыр болған. Күдікті қазір қамауда. Azattyq Rýhy осы резонансты оқиғаны назарда ұстайды.