Өңірде соңғы тіркелген науқастар арасында бала да бар
Павлодар облысында соңғы тіркелген науқастардың төртеуі – облыс тұрғындары. Олар: 1984, 1979, 1963 жылдары туған әйел адамдар және 2011 жылғы ұл бала. Бұл туралы Мемлекеттік комиссияның шұғыл штабы мәлімдеді.
Науқастар тұрғылықты жері бойынша байланыста болуы мүмкін деген болжаммен үй карантині режимін сақтап отырған. COVID-19 вирусын жұқтырғаны анықталғаннан кейін олар жұқпалы аурулар стационарына жатқызылған.
«Сондай-ақ, коронавирус инфекциясы Мичурино ауылының маңындағы бақылау-өткізу бекетінен өтпекші болған Шымкент қаласының тұрғыны, 1986 жылы туған ер адамда анықталған. Оның қолында COVID-19 ауруын жұқтырмағанын растайтын анықтама болмағандықтан, ол карантиндік стационарға жеткізілген. Осылайша, тексеру нәтижелері бойынша оның коронавирусты жұқтырғаны анықталған. Ұлттық сараптау орталығының облыстық бөлімшесінің мамандары пәтерлерде, үйлердің кіреберістерінде, карантиндік госпитальде, жұмыс орындарында зарарсыздандыру жұмыстарын жүргізді», - делінген хабарламада.
Барлық жағдай бойынша байланыста болуы мүмкін адамдар тобы анықталып, оларды оқшаулау жұмыстары жүргізіліп жатыр. Эпидемияға қарсы шаралар қолға алынған.
Бүгінде Павлодар облысында коронавирус инфекциясын жұқтырған 110 адам тіркелген.