Ол 5 маусым күні қоғамдық жұмыстан кейін түрмеге оралуы тиіс еді
Қарағанды облысында түрмеден қашып кеткен жазасын өтеуші ұсталды, деп хабарлайды Azattyq Rýhy.
Естеріңізге сала кетейік, ол 5 маусым күні қоғамдық жұмыс атқарғаннан кейін колонияға оралудың орнына ізім-ғайым жоғалды. «Алаяқтық» үшін сотталған ол осы жылы қыркүйек айында бостандыққа шығуы керек еді. Бірақ соңғы оқиғаны ескере отырып – жазасын өтеуден жалтарғаны үшін тағы мерзім қосылуы мүмкін.
«Қылмыстық кодекске сәйкес, жазаны өтеуден жалтарғаны үшін 2 жылға дейін бас бостандығынан айыру жазасы қарастырылған», - деп мәлімдеді Қарағанды облысының ҚАЖД баспасөз қызметі.
Бұған дейін БАҚ-та Қарағанды облысындағы түрмеден 1992 жылы туған Жандос Ошанаевтың қашып кеткені хабарланған еді. Ол аса ірі көлемде алаяқтық жасағаны үшін сотталған (Қылмыстық кодекстің 190-бабы 3-бөлігі 1, 2, 3-тармақтары).
«Немқұрайлылық танытып, қашуға жол берген колония қызметкерлері де жазаланады», деп хабарлады полиция.
Белгілі болғаны, жазасын өтеуші Саран қаласынан колонияға оралар жолда жасырынған. Бұл минималды қауіпсіздік колониясында сотталғандар қоғамдық жұмыстарға тартылады – саябақтарды, гүлзарларды тазалайды, бояйды, ағартады, қоғамның пайдасына басқа да жөндеу-құрылыс жұмыстарын жүргізеді.