Крипто, майнинг, цифрландыру: 100 млн теңгені жымқырғандар ұсталды
Аталған салаларда 17 қылмыс анықталды
Мұрағаттарды цифрландыруға бөлінген 100 млн теңгеден астам қаражатты мемлекеттік қызметкер мен мердігер жымқырған, деп хабарлайды Azattyq Rýhy.
«Мәдениет және спорт министрлігі мұрағат істері және құжаттама комитеті төрағасының орынбасары, сондай–ақ IT-компанияның директоры «Цифрлық Қазақстан» мемлекеттік бағдарламасын іске асыру шеңберінде ақпараттық жүйені әзірлеуге бөлінген 105 млн теңгеден астам қаражатты жымқырғаны үшін сотталды», - делінген хабарламада.
«Құжаттардың бірыңғай электрондық мұрағаты» ақпараттық жүйесін техникалық сүйемелдеуге бюджет ақшасын бөлу арқылы ақша жымқырылған. Сондай-ақ аудару арқылы, компьютерлік технологиялар саласындағы терминологияны қолдана отырып, орындалған жұмыстарға қайта қосу арқылы парақорлар көздегенін жүзеге асырған.
«Бұл ретте, техникалық тапсырманы мердігердің өзі әзірлеп, пайдалануға енгізді және кепілді техникалық сүйемелдеу бойынша міндеттемені қабылдады. Алайда, комитет басшылығы орындалған жұмыстарға бюджет қаражатын бөліп, оны орындалған жұмыстардың жалған актілері бойынша АЖ әзірлеушісіне қайта аударды. Ұрланған ақша қаражаты қылмыстық шығу тегін жасыру және заңды айналымға енгізу мақсатында сенімді тұлғаларға ресімделген қымбат жылжымалы және жылжымайтын мүлікті сатып алуға бағытталған», - делінген ақпаратта.
Сот үкімімен сотталушылардан келтірілген залал сомасын өндіріп, әрқайсысына 6,5 жылға бас бостандығынан айыру жазасы тағайындалды.
Сонымен қатар, бұрынғы мемлекеттік қызметші мемлекеттік лауазымдарды атқару құқығынан өмір бойына және мемлекеттік наградалардан айырылды, ал мердігер компанияның басшысы 7 жыл мерзімге коммерциялық және коммерциялық емес ұйымдарда басшылық лауазымдарды атқару құқығынан айырылды.
Үкім заңды күшіне енген жоқ.
ҚМА басшылығының тапсырмасы бойынша биыл наурыз айынан бастап агенттікте цифрландыру, заңсыз майнинг және криптовалюта айырбастау саласындағы қылмыстарды анықтау және тергеу жөніндегі арнайы бөлімшелер жұмыс істейді.
Қазірдің өзінде аталған салаларда 17 қылмыс анықталды, оның 13-і заңсыз крипто алмасу операцияларын ұйымдастыру және 3 майнинг фермасының қызметі фактілері бойынша.
