Елордада коронавирустан көз жұмған науқас ауруханаға ауыр халде түскен

Қазақстанда коронавирустан көз жұмғандар саны 14 адамға жетті. Соңғы екі жағдай Нұр-Сұлтан мен Шымкент қалаларында тіркелген. Елордалық Қоғамдық денсаулық сақтау басқармасы басшысының айтуынша, астанада қайтыс болған науқас ауруханаға ауыр халде жеткізілген.

Марқұм – 1950 жылы туған Нұр-Сұлтан қаласының тұрғыны екен. Оның басқа да аурулары асқынған дейді мамандар.

«Аталған азамат 11 сәуір күні жедел жәрдем қызметі арқылы провизорлық ауруханаға ауыр халде келіп түскен. Ол жедел реанимацияға жатқызылған. Артериялық гипертензия, қант диабеті, жүректің ишимия ауруы секілді қосымша диагноздары болған. Бекітілген хаттамаға сәйкес, ем жүргізілді. Алайда, 2020 жылдың 13 сәуірінде қарқынды терапияға қарамастан, науқас көз жұмды. Сонымен қатар, туысқандары арасынан жақын байланыста болған адамдар коронавирусқа тексеріліп, үй жағдайында карантинге орналасты», - деді Басқарма басшысы Сәуле Қисықова.