Қазақстанда жүрек және перифериялық қан тамырлары кемістігімен туған балалар көбейген

Алматыдағы Перинатология және балалар кардиохирургиясы орталығында іштей жүрек ақауымен туған нәрестелерге МӘМС есебінен күрделі операциялар жасалып жатыр, деп хабарлайды Azattyq Ruhy.

Балалар кардиохирургиясы бөлімшесі меңгерушісі Геннадий Нигайдың айтуынша, жыл сайын орталықта жүрек және перифериялық қан тамырлары кемістігімен туған 300 балаға ота жасалады. Орталық мамандары шала туған 3 мыңнан аса баланың өмірін сақтап қалады. Жүректе ақау бары іште жатқанда анықталған пациенттердің ішінде бірнеше жасқа толған балалар да, туғанына бірнеше сағат қана болған шараналар да бар.

«Біздің жаңа туған нәрестелердің жүрегін қалпына келтіруге бағытталған күрделі оталарды жасаймыз. Кардиохирургия бөлімшесі толықтай ең соны үлгідегі қондырғылармен жабдықталған. Қондырғылар ғана емес, диагностиканың заманауи әдістері де қолданысқа енгізіліп жатыр. Осының бәрі тәуекелдердің алдын алуға көмектеседі. Мысалы, бұрын біз салмағы 10 келіге жеткен балаларға ғана ота жасайтынбыз. Қазір тіпті жаңа туған шараналарды да операцияға алып жатырмыз. Тіпті салмағы небәрі 700 грамм болатын нәрестеге де ота жасадық. Осының бәрі кепілдендірілген тегін медициналық көмек және МӘМС қаражатына жасалып жатыр», - деді Геннадий Нигай.

Орталық дәрігерлері еліміздің өзге өңірлерінен келген кішкентай пациенттерге де жоспарлы көмек көрсетеді. Кезең-кезеңмен хирургиялық ота жасауды қажет ететін пациенттер де аз емес. Мысалы, дәрігерлер 6 жастағы Евгения Увашеваның жүрегіне осымен екінші рет ота жасады. Бүлдіршін ілуде бір кездесетін субаортальды стеноз дертімен туылған.

«Өткен жылы осында, Перинатология орталығында қызыма ота жасалды. Бірақ биыл жағдайы қайта нашарлап, ентігу, тершеңдік белгілері күшейген соң қайтып келдік», - деді анасы Светлана Увашева.

Геннадий Нигайдың сөзіне сүйенсек, бір жыл ішінде Евгенияның жүрегінің қақпақшалары тарылып қалған. Сондықтан оған тағы бір ота жасау қажет болды. Құны 3 миллион теңгеге жуықтайтын екінші операция МӘМС шеңберінде жасайды.

«Бізге кейде өзге өңірлерден денсаулығы тексерілмеген, ауыр халдегі балалар келеді. Оларға шұғыл түрде портал ашып, жан-жақты көмек көрсетіп, бірер күнде үйлеріне қайтарамыз. Мұндай оталардан кейін балалар бірнеше күн ішінде қалпына келеді», - деді дәрігер.