Ақтөбе облысында карантин тәртібін бұзған 63 адам қамалды
ТЖ режимін бұзушылардың дені – дүкен иелері
13 сәуірге дейін ақтөбелік полиция өкілдері төтенше жағдай режимін бұзған 325 жағдайды анықтады. Нәтижесінде 298 адам ұсталса, оның 63-і қамауға алынған. 117 адамға айыппұл салынып, 60 тұрғынға ескерту жасалды. 51 материал сотқа жіберілді. Бұл туралы ІІМ баспасөз қызметі хабарлады.
ТЖ режимін бұзушылардың дені – дүкен иелері. Белгіленген мерзімнен артық жұмыс істеген дүкендер 100-ден асады. Олардың барлығы әкімшілік жауапқа тартылды.
ТЖ режимінде тәртіп бұзуға итермелейтін іс-әрекеттер бойынша 27 дерек тіркеліп, 14 адамға айыппұл салынып, 12-сі қамауға алынды.
Блок бекеттерді заңсыз айналып өтетіндер саны да азаймай отыр. Ақтөбе облысында осындай 16 жағдай тіркелді. 4 адам қамауға алынып, 2-еуі айыппұл төлеуге мәжбүр болды. 10 материал сотқа жіберілді.
