Несие төлеуді кейінге қалдыруға 1,1 млн тұрғыннан өтініш түсті

983 мыңнан астам жеке тұлғаның өтініші бойынша шешім қабылданды

Несие төлеуді кейінге қалдыруға 1,1 млн тұрғыннан өтініш түсті
Фото: ашық дереккөзден

1 миллионнан астам қазақстандық несие төлеу бойынша негізгі борыш пен сыйақы төлеу мерзімін кейінге қалдыруды сұрап, банктерге өтініш берген. Бұл туралы Қазақстан қаржыгерлері қауымдастығы кеңесінің төрағасы Елена Бахмутова мәлім етті.

«9 сәуірдегі жағдай бойынша 1 млн 137 мыңға жуық адамның өтініші қанағаттандырылды. Жеке тұлғалар бойынша 983 мың 123 өтінішті кейінге қалдыру бойынша шешім қабылданды. Несиені төлеу мерзімін кейінге шегеру бойынша өтініштер әлі де қабылдануда. Банк өтінішті 10 күн ішінде қарайды. Егер әлеуметтік жағынан аз қамтылған адам өтініш берсе, ол бойынша тез арада шешім қабылданады. Мұндай жағдайда 10 күн күтудің қажеті жоқ. Банктер бұл процесті онлайн режимде де жүргізіп жатыр», - деді ол.

Сондай-ақ, Елена Бахмутова карантин кезінде банктер таңғы сағат 9.00-ден бастап, кешкі 17:00-ге дейін жұмыс істейтінін атап өтті.

«Әлеуметтік көмек алу үшін, яғни 42 500 теңгеге қол жеткізу үшін банк қызметіне жүгініп жатқандар көп. Бұл орайда несие ұйымдары шот ашу секілді қызметтерді онлайн режимге көшірді. Ол үшін банкке барудың қажеті жоқ. Жалпы, жауапты министрліктің хабарлауынша, әлеуметтік көмек алу үшін 3,2 миллион өтініш түскен», - деді қауымдастық басшысы.

Әсел Тұмашқызы, Нұр-Сұлтан

×
Бұл желілік ресурстың ақпараттық өнімдері 18 жастан асқан адамдарға арналған.