Қазақстанда жұмыс күші аз өңірлерге қоныс аударғандарға қандай жеңілдіктер жасалады

2023 жылы 214 отбасы Жұмыс күші артық өңірлерден жұмыс күші тапшы өңірлерге қоныс аударушылар мен қандастарды және олардың отбасы мүшелерін бейімдеу және интеграциялау бойынша қызметтер көрсету жөніндегі пилоттық жобаға қатысты, деп хабарлайды Azattyq Ruhy.

Еңбек және халықты әлеуметтік қорғау министрлігі атап өткендей, пилоттық жобаға Алматы, Жамбыл, Жетісу, Қызылорда, Маңғыстау, Түркістан облыстарынан, Астана, Алматы, Шымкент қалаларынан қоныс аударушылар қатысты.

Пилоттық жоба қоныс аударушылар мен қандастардың отбасыларын бейімдеудің жеке жоспарын жасау және қатысушыларға мансап орталықтары қызметкерлерінің қатарынан жеке көмекшілерді бекіту арқылы сүйемелдеуді көздейді.

«Бейімделудің жеке жоспары 25 қызметті қамтиды. Олардың ішінде: қоныс аудару өңіріне көшу және орналастыру (келген күні, тасымалдау түрі, келетін отбасы мүшелерінің саны); материалдық көмекті, оның ішінде экономикалық мобильділік сертификатын ресімдеу; тұрақты жұмыс орнына жұмысқа орналастыру, сондай-ақ қажет болған жағдайда кәсіптік даярлау, қайта даярлау және біліктілігін арттыру; тұруға арналған тұрғын үйді іздеу және іріктеу экономикалық ұтқырлық сертификаты арқылы төленетін отбасылар; отбасы мүшелерін бейімдеу және біріктіру», - дейді мамандар.

Қоныс аударушының немесе қандастың, сондай-ақ оның отбасы мүшелерінің тұрғылықты жері өзгергеннен кейін бес жыл ішінде мансап орталығының мамандары бейімделу мен интеграция барысына мониторинг жүргізетін болады. Ол үшін Отбасының цифрлық картасынан алынған деректер және әлеуметтік әл-ауқатты қадағалауға арналған арнайы мобильді қосымша пайдаланылады.

Пилоттық жобаға қатысушылардың бірі ҚХР-дан қоныс аударған – Майна Калимаштың отбасы болды. Шығыс Қазақстан облысының еңбек мобильділігі орталығы оларға бейімдеу мен интеграциялаудың жеке жоспарын жасады. Қандастарды қабылдау жөніндегі комиссияның отырысында Майнаның отбасын өңірлік квотаға қосу туралы оң шешім қабылданды, сондай-ақ мансап орталығы отбасының әрбір мүшесіне 70 АЕК мөлшерінде көшуге арналған шығыстарды өтеу туралы шешім қабылдады.

«Мен ҚХР-дан ерікті қоныс аудару бағдарламасы бойынша көшіп келдім және Шығыс Қазақстан облысында қоныстануға шешім қабылдадым. Өскемен қаласының мансап орталығы қызметкерлерінің арқасында бізге тиісті барлық мемлекеттік қолдау шараларын алдым», – деп бөлісті қоныс аударушы.

Бейімдеу мен интеграциялаудың жеке жоспары аясында Майнаның отбасы Қазақстанның тарихы мен мәдениетімен танысты. Майнаның балалары Өскемен қаласының орта мектебінде білім алатын болды. Ал заң мамандығы бойынша жоғары білімі бар Майнаны жұмысқа орналастыру шаралары қаралуда.

Естеріңізге сала кетейік, 2023 жылы Шығыс Қазақстан және Павлодар облыстарында жұмыс күші артық өңірлерден жұмыс күші тапшы өңірлерге қоныс аударушылар және  қандастар мен олардың отбасы мүшелерін  бейімдеу және интеграциялау бойынша қызметтер көрсету жөніндегі пилоттық жоба іске қосылды. 2024 жылы бұл тетік еліміздің басқа да еңбек күші тапшы өңірлерінде кеңінен қолданылатын болады.