Ақмола облысында алимент төлемей жүргендерге шара қолданылды
28 борышкерге қатысты қылмыстық іс тіркелді
Прокуратура органдары жүктелген міндеттер шегінде заңға сәйкес атқарушылық іс жүргізудің заңдылығына жоғары қадағалау жүргізді, деп хабарлайды Azattyq Ruhy.
Осы қадағалаудағы басым бағыттардың бірі - алимент өндіріп алу.
Облыс прокуратурасы ҚР Қылмыстық кодексінің 139-бабы бойынша алимент төлемейтіндерді қылмыстық жауапкершілікке тарту бойынша жұмысты жандандырды.
"Биыл жүргізілген жұмыстың нәтижесінде прокуратураның үйлестіру шараларымен алимент төлеу жөніндегі міндеттерді атқармайтын 28 борышкерге қатысты қылмыстық істер тіркелді, оның ішінде 8 борышкер бойынша айыптау үкімдері шығарылды. Бүгінгі таңда сотқа дейінгі тергеп-тексеру органдарының өндірісінде тағы 5 қылмыстық іс бар", - делінген ведомство хабарламасында.
Сонымен қатар Қазақстан Республикасы Әкімшілік құқық бұзушылық туралы Кодексінің 669-бабы бойынша алимент өндіріп алу туралы сот шешімін орындамағаны үшін 100-ден астам борышкерлер әкімшілік жауаптылыққа тартылды.
Биыл Ақмола облысы прокуратурасының шараларымен 600 млн тенгеден астам алимент бойынша қарыз өтелді.
Бұл бағыттағы жұмыс жалғасып жатыр.
