Елімізде 120 медицина қызметкері коронавирус жұқтырған
Бір науқастың жағдайы ауыр
Бұл туралы еліміздің Бас санитар дәрігері Айжан Есмағамбетова мәлім етті.
«Бүгінде 120 медицина қызметкері қауіпті вирусты жұқтырғаны анықталды. Олардың 67-сі коронавирус жұқтырды деген күдікке ілінген және диагнозы анықталған науқастармен тікелей жұмыс істеген. Біреуі ауыр жағдайда жатыр. Сондай-ақ 9 қызметкердің жағдайы орташа деңгейде. Қалған 57 адамның жағдайы жеңіл және симптомсыз өтіп жатыр», - деді Айжан Есмағамбетова Орталық коммуникациялар қызметінде өткен онлайн брифингте.
Бас санитар дәрігердің айтуынша, вирус жұқтырған медициналық қызметкерлерге әлі төлем жүргізілмеген. Дегенмен, дәрігерлерде әлеуметтік төлем жүргізудің құқықтық-нормативтік құжатының жобасы жасалып қойған.
Естеріңізде болса, бұған дейінгі брифингтерде Ақпарат және қоғамдық даму министрі Дәурен Абаев медицина қызметкерлері коронавирус жұқтырған жағдайда 2 миллион теңге мөлшерінде сақтандыру төлемі берілетінін айтқан. Ал, медициналық қызметкер қайтыс болған жағдайда 10 миллион теңге мөлшерінде өтемақы беріледі.
Айта кету керек, бүгінге дейін Қазақстанда қауіпті індеттен 6 адам көз жұмды. 45 адам жазылып шықты.
Әсел Тұмашқызы, Нұр-Сұлтан
