Әзірге күдіктілер жоқ – ІІМ Алматы мектебіндегі бала зорлығы туралы
Марат Қожаев тиісті сараптама тағайындалғанын мәлімдеді
Ішкі істер министрлігі Алматыдағы жекеменшік мектепте 1-сынып оқушысын зорлады деген күдіктінің әлі анықталмағанын мәлімдеді, деп хабарлайды Azattyq Ruhy.
ІІМ бірінші орынбасары Марат Қожаев аталған іске қатысы сараптама тағайындалғанын мәлімдеді.
Қожаевтың айтуынша, іс сотқа дейінгі тергеп-тексерудің бірыңғай тізіліміне тіркелген. Бірақ ол тергеу құпиясын алға тартып, істің жай-жапсарын жариялаған жоқ.
«Аталған оқиғаға бойынша сотқа дейінгі тергеу басталды. Тергеу барысы туралы түсініктеме бере немесе алдын ала болжам жасай алмаймын. Процессуалдық заң бұған тыйым салады. Сондықтан тергеу нәтижесін күтейік. Әзірге күдіктілер жоқ, қажетті сараптамалар тағайындалды», — деді брифингте ІІМ басшысының орынбасары.
Тақырыпқа орай: Жыныстық зорлық-зомбылық элиталық мектептерде неге жиілеп кетті – сарапшылар пікірі
Еске салайық, Алматының халықаралық мектебінде 1-сынып оқушысы зорлыққа ұшырағаны туралы баланың анасы жариялады. Оқиға 11-13 қыркүйек аралығында болғаны айтылды. Қазір сұмдық жағдайды Қазақстанның бала құқықтары жөніндегі уәкілі Динара Закиева да өз бақылауына алды. Ал зәбір көрді деп танылған оқушымен психолог жұмыс істеп жатыр. Тергеу амалдары да жалғасып жатыр.
