AMANAT өкілдері «АрселорМиттал Теміртау» ЖЭО-ның қысқа дайындығын сынға алды

Қарағанды облысында ҚР Парламенті Мәжілісінің депутаты Берік Бейсенғалиевтің төрағалығымен «AMANAT» партиясы жанындағы Өңірлік даму жөніндегі республикалық кеңестің көшпелі отырысы өтті, деп хабарлайды Azattyq Ruhy «AMANAT» партиясы жанындағы Өңірлік даму жөніндегі республикалық кеңесінің баспасөз қызметіне сілтеме жасап.

Отырысқа «AMANAT» партиясының Хатшысы Ержан Жылқыбаев, Қазақстан Республикасы Энергетика вице-министрі Жандос Нұрмағанбетов, Индустрия және құрылыс вице-министрі Тимур Қарағойшин, Экология және табиғи ресурстар вице-министрі Мансұр Ошурбаев, кеңес мүшелері – Парламент Мәжілісінің депутаттары, сонымен бірге бейнеконференцбайланыс режимі арқылы филиалдар мен өңірлік кеңестер төрағалары, облыс әкімдерінің орынбасарлары қатысты.

Отырыс барысында кеңес мүшелері «АрселорМиттал Теміртау» АҚ ЖЭО-2, «Теплотранзит Қарағанды» ЖШС, Қарағанды қаласының 3-ЖЭО-да жылу беру маусымына дайындық жұмыстарының барысымен танысты.

«Теміртау қаласындағы ЖЭО-2-де болған кеңес мүшелері жылу беру маусымына дайындық барысы мен «АрселорМиттал Теміртау» АҚ атынан инвесторлардың қабылдап жатқан шараларына көңілі толмады. Кеңес төрағасы, Парламент Мәжілісінің депутаты Берік Бейсенғалиев өткен қыста алты қазандықтың төртке жуығы апатты жағдайда болғанын, оның ішінде қазандық 19-дан 150 күнге дейін тоқтап қалғанын атап өтті. Соның салдарынан қалада жылу энергиясының тапшылығы жалғаса бермек. Сапасы төмен, арзан көмірді пайдалану бірнеше қазандықтың істен шығуына әкелді. Инвестор 7-қазандықты қазан айында пайдалануға беруге міндетті болған. Алайда уақытында орындалмай отыр. Мерзімі келесі жазға ауыстырылды», - делінген хабарламада.

Отырыс аясында бейнеконференцбайланыс режимі арқылы еліміздегі 2023-2024 жылдарға арналған жылыту маусымына дайындық мәселелері талқыланды.

ҚР Энергетика вице-министрі Жандос Нұрмағанбетов еліміздің энергетикалық кәсіпорындарының алдағы күзгі-қысқы кезеңге дайындық барысы туралы ақпарат беріп, электр қуаты бойынша 10 энергоблокты, 49 қазандықты және 54 турбинаны күрделі жөндеу жоспарланғанын атап өтті. Бұл ретте 5 энергоблокта, 23 қазандықта және 20 турбинада түрлі кезеңде жөндеу жұмыстары жүргізілуде. Сондай-ақ ол өз сөзінде «қызыл аймақта» орналасқан – Астана, Семей, Ақтау, Теміртау, Екібастұз, Жезқазған, Риддер және Арқалық жылу электр станцияларына тоқталды.

Бұл ретте партия хатшысы Ержан Жылқыбаев жоғарыда аталған облыстардан бөлек, облыстық кеңестердің мәліметі бойынша тағы екі қала – Кентау және Шахтинскіде қауіп бар екенін атап өтті.

«Атап айтқанда, Кентау қаласында тұрғындар өткен қыс бойы пәтерлерінің суықтығына шағымданған болатын. Партия Төрағасы Ерлан Жақанұлы Қошанов 20 ақпанда Кентау жылу электр орталығы ұжымымен кездесуінде қаржы бөлу және бұл мәселені шешуге көмектесу жөнінде тапсырма берген болатын. Ақша бөлінді, бірақ 8 қазандықты қайта құру және жөндеу айтарлықтай артта қалды, Шахтинск ЖЭО-ның №3 қазандығын жөндеу бойынша да жағдай осындай», - делінген хабарламада.

Индустрия және құрылыс вице-министрі Тимур Қарағойшин коммуналдық, әлеуметтік және тұрғын үй секторларының қысқа дайындығы мәселелеріне тоқталды. Атап айтқанда, жылу жүйесіндегі күрделі жөндеу мен жөндеу жұмыстарын қоспағанда, барлық білім беру нысандары дайын, денсаулық сақтау нысандары 99 пайызға, тұрғын үй қоры 94 пайызға дайын. Сонымен қатар жылумен жабдықтау желілерінің бойында жөндеу жұмыстарының қарқыны төмен және жұмыстар уақытында аяқтамалмауы мүмкін 10 проблемалық аумақ бар. Олар: Маңғыстау, Солтүстік Қазақстан, Шығыс Қазақстан, Қарағанды және Қызылорда облыстары, сондай-ақ Шымкент қаласы.

Қарағанды облысы әкімінің бірінші орынбасары Вадим Басин Қарағанды облысының тұрғын үй-коммуналдық шаруашылығының дайындығы туралы баяндаса, бейнеконференция арқылы Павлодар – Серік Батырғожинов, Шығыс Қазақстан – Нұрымбет Сақтағанов, Маңғыстау – Руслан Бектемір облыстары әкімінің орынбасарлары да сөз сөйледі.

Отырысты қорытындылаған Кеңес төрағасы, Парламент Мәжілісінің депутаты Берік Бейсенғалиев юиылғы 1 қыркүйекте Мемлекет басшысы «Әділетті Қазақстанның экономикалық бағдары» атты Қазақстан халқына Жолдауында арнайы айтқан бұл мәселенің стратегиялық маңыздылығын атап өтті. «Өткен қыста еліміздің жылу электр станцияларында қайта-қайта апат болды. Бұл жағдай жылдар бойы шешілмеген мәселенің бетін ашып берді. Инфрақұрылымның әбден тозуы халықтың тұрмыс сапасына тікелей әсер етеді. Индустрияландыру қарқынын да тежейді.

Бұл – Тәуелсіздік алған 30 жылдан астам уақыт ішінде аталған мәселеге жүйелі көзқарастың болмағанының салдары.

«30 жыл ішінде Қазақстанда бірде-бір жаңа жылу электр орталығы салынбаған. 37 жылу электр станциясының 22-сі – жеке, 15-і – мемлекеттік. Жылу электр станцияларының 76 пайызы 50 жылдан астам, қалғаны 30 жылдан астам жұмыс істеп тұр. Жылу электр орталығының негізгі жабдықтарының орташа тозуы 65 пайыздан асады», - делінген партия хабарламасында.

Отырыс қорытындысы бойынша өңірлік кеңестерге мемлекеттік органдар мен әкімдіктерді алмастырмай, қауіп төніп тұрған жылу электр станциялары мен жылу желілерін жөндеу мәселелерін күнделікті бақылауға алу, қажет болған жағдайда Республикалық Кеңеске хабарлауға тапсырма берілді.

Отырыстан кейін Кеңес мүшелері «Теплотранзит Қарағанды» ЖШС-де болып, Қарағанды қаласының жылу желілерінің дайындығын тексерді. Атап айтқанда, барлық жоспарланған 15 шақырым құбырлар уақытылы ауыстырылды, жылу желілерін қайта құрудың 3 учаскесі бойынша – 12,1 шақырымның 11,3 шақырымы немесе 93 пайызы жоспарға сай қайта жаңартылды.

Қарағанды қаласының ЖЭО-3-те де жылу беру маусымына дайындық бойынша барлық жұмыстар уақытылы жүргізіліп, аяқталуға жақын. Биыл 7 қазандық агрегаты мен 3 турбина жөнделді. Күл үйіндісін кеңейту жобасы да жүзеге асырылып жатыр.