Қаржы министрлігі түзетулерді қабылдамаған
Мәжіліс депутаты Асхат Аймағамбетов қырқүйек айында мектептердің жөндеуі бітпеді деп, жыл сайын директор, басқарма басшысы, министрлік сын астында қалатынын айтты, деп хабарлайды Azattyq Ruhy.
«Басты себептердің бірі мемлекеттік сатып алу (тендер) рәсімдерінің шикілігінде. Оның кесірі, әсіресе, әлеуметтік салаға қатты тиіп жатыр. Салынған ғимараттардың сапасыз болуы, зерттеулер үшін қажетті реактивтер мен құрылғыларды сатып ала алмау, күнделікті тауар сапасының төмендігі, бюджет қаражатының игерілмеуі – бұлар да негізінен осы сатып алу рәсімінің тиімсіздігіне байланысты. Осы проблеманы реттеу үшін біз заңға тиісті түзетулер дайындап, Үкіметке қорытынды дайындау үшін маусым айында жіберіп едік. Оның алдында Комитетіміздің отырысында облыс әкімдерінің орынбасарларымен, облыстық басқармалардың басшыларымен, мектеп, ауруханалардың өкілдерімен талқылап, Қаржы вице-министрінің қажетті түзетулерді қолдайтыны туралы уәдесін естіген едік. Дегенмен, жеме-жемге келгенде, Қаржы министрлігі келіспейтіндігін айтып, енді осы түзетулерді қолдамау туралы қорытынды дайындалып жатыр. Бұл әрекетті түсіну қиын. Дегенмен, осы түзетулерді енгізу бойынша жұмысты әрі қарай жалғастырамыз», - деп жазды Аймағамбетов.
Авторы: Аягөз Құрмаш