Кассалық фильмдер аудиторияға мемлекеттік тілде қолжетімді болуы қажет – Оралов

Мәдениет және спорт министрі Асхат Оралов көрермендердің сұранысына ие кассалық фильмдерді мемлекеттік тілде дубляждау мәселесін көтерді, деп хабарлады Azattyq Ruhy.

«Жыл басынан Қазақстанда бірнеше ірі кинопремьера өтті. Олардың кейбірі қазақ тілінде дубляждың болмауына байланысты көрермендеріміздің назарынан тыс қалып қойды. Мен халықтың пікірін үнемі бақылап отырмын. Біз бұл мәселені ешқашан естен шығармауымыз керек. Кассалық фильмдер аудиторияға мемлекеттік тілде қолжетімді болуы қажет», - деді Мәдениет және спорт министрі Асхат Оралов.

Министр жыл сайын кем дегенде 15 кинопремьераның қазақ тілінде дубляжі болуы керек деген міндет қойылғанын айтты.

«Мысалы, былтыр Мәдениет және спорт министрлігінің қолдауымен көрермендердің қызығушылығын тудырған 3 кинопремьера қазақ тіліндегі дубляжбен шықты. Биыл біз мәдениет саласын дамытудың 7 жылдық тұжырымдамасын әзірлеп, Үкімет қаулысымен бекіттік. Енді жыл сайын кем дегенде 15 кинопремьераға қазақ тілінде дубляж жасалуы керек деген міндет қойдық. Наурыз айында мемлекеттік тілге дубляж жасау үшін фильмдерді іріктеу ережесін бекіттім. Министрлік алдағы бірнеше жылда жалпы прокаттағы қазақ тіліндегі фильмдердің үлесін 30%-ға дейін жеткізуге ниетті. Бұл көрсеткіш кассалық шетелдік фильмдерге мемлекеттік тілде дубляж жасау арқылы да артуы тиіс», - деді министр.

Оның айтуынша, тағы бір өзекті мәселе - қазақша дубляжбен шығатын картиналар сеансы әрдайым көрермендерге ыңғайлы уақытта қойыла бермейді.

«Бұл туралы да маған әлеуметтік желіде жиі жазады. Фильмді мемлекеттік тілде көргісі келетіндер көбінесе түнде киноға баруға мәжбүр. Бұл, әрине, дұрыс емес. Біз кинотеатрлардың жекеменшік кәсіп нысаны екенін түсінеміз. Дегенмен де мемлекеттік тұрғыдан біз дүниежүзі көретін кинопремьералардың қазақ тілінде және ыңғайлы уақытта көрсетілуін қамтамасыз етуге міндеттіміз. Сондықтан жеке кәсіпкерлермен, кинотеатрлардың иелерімен осы бағыттағы жұмысты жандандыру қажет», - деді Асхат Оралов.