Бала құқықтары жөніндегі уәкіл Абай облысына жол тартты

Бүгін ғана Мемлекет басшысының өкімімен ҚР Бала құқықтары жөніндегі уәкіл лауазымына тағайындалған Динара Зәкиева Абай облысына баратынын мәлімдеді, деп хабарлайды Azattyq Ruhy.

Бұл туралы ол өзінің Facebook парақшасында жазды. Зәкиева өрт кезінде қаза тапқан орман шаруашылығы қызметкерлерінің балаларымен және эвакуациялық пункттердегі балалармен кездесетінін айтты.

«Қасым-Жомарт Кемелұлының маған артқан сенімі үлкен жауапкершілік деп білемін. Бұл - балалық шақты қорғау, отбасыларды қолдау саласындағы жағдайды жақсартуға таптырмас мүмкіндік. Бұған бар күш-жігерімді саламын. Бүгін эвакуацияланған балалармен кездесу үшін Абай облысына жол жүремін. Баршаңызға мәлім, Мемлекет басшысы өрттен зардап шеккен отбасыларға жәрдемақы тағайындау, балаларды оқыту мәселесі бойынша арнайы тапсырма берген болатын. Бүгін өрт кезінде қаза тапқан орман шаруашылығы қызметкерлерінің балаларымен және эвакуациялық пункттердегі балалармен кездесу үшін Абай облысына барамын», - деп жазды ол.

Сонымен қатар Бала құқықтары жөніндегі уәкіл азаматтарға әрдайым ашық екенін ескеріп, өзінің ұялы телефон нөмірін де жазды.

«Қазір жекеме сұрақтар мен ұсыныстар келуде. Ұсыныстарыңыздың барлығын да қарастырамын деп уәде беремін. Әрдайым ашықпын. Осы жерге жеке телефон номерімді қалдырамын. (тел: 8 705 884 70 40) Өтініш, хабарламаны жазба түрінде тек уатсапқа қалдырсаңыздар. Міндетті түрде жауап беремін. Бала баршамызға ортақ. Бала-бақытымыз. Баланың құқығын қорғау әрқайсымыздың міндетіміз. Әрбір бала ата-анасының бүгінгі жағдайына қарамастан бақытты болуға лайықты. Менің жұмыстағы басты ұстанымым осы», - деп жазды Динара Зәкиева.