Шымкентте футбол чемпионатында 23 мың жанкүйер еліміздің әнұранын орындады

Бүгін Шымкент қаласында футболдан Қазақстан чемпионатының 12-ші туры аясында Ордабасы мен Атырау командалары арасында тартысты матч өтуде, деп хабарлайды Azattyq Ruhy Шымкент қаласы әкімінің баспасөз қызметіне сілтеме жасап.

Ойынның ашылу салтанаты сәтінде 4 маусым Рәміздер күніне орай ҚР еңбек сіңірген әртісі, мемлекеттік сыйлықтың лауреаты, опера әншісі Майра Мұхамедқызымен бірге орталық стадионға жиналған 23 мыңнан аса жанкүйер бір мезетте еліміздің әнұранын шырқады.

Көк туымыз қалықтаған аспан астында шабыт алған футбол шеберлерінің бұл ойыны тартысқа толы болды. Матч Ордабасылықтардың 2:1 есебіндегі жеңісімен бітті. Ойын барысы жанкүйерлерге тамаша әсер қалдырды. Бұл ойынды көруге келген жанкүйерлердің көңіл-күйінен айқын байқалды.