Маңғыстаудың жазық даласында бейорганикалық тұрмыстық қалдықтар шашылып жатыр

Маңғыстау облысының қоқыспен ластанған даласын жергілікті блогер Азамат Сәрсенбаев видеоға түсіріп, әлеуметтік желіге жүктеді, деп хабарлайды Azattyq Ruhy Lada.kz-ке сілтеме жасап.

Оның айтуынша, мұның бәрі желдің және Баянды ауылының маңындағы қоқыс полигонының айналасында тиісті қоршаудың болмауының нәтижесі.

Облыстың Мұнайлы ауданының жазық даласында пластикалық бөтелкелер мен полиэтилен пакеттерінің қоқыстары толып жатыр. Бұл қалдықтар Баянды ауылының маңында орналасқан қоқыс полигонының айналасында бірнеше шақырым бойына шашылып жатыр.

«Барлығы жан жаққа желмен шашылады, өйткені полигонның айналасында қоршау жоқ. Биіктігі кемінде үш метр қабырға, тікенді сым болуы керек. Ондай жоқ. Онда жануарлар жайылып жүр», - деді блогер.

Бұған дейін Форт-Шевченкодағы полигон қаладан 4,5 шақырым жердегі жаңа орынға ауыстырылғаны хабарланған болатын. Бұл Түпқараған ауданы тұрғындарының талабы бойынша жасалды.