Жүргізуші кешірім сұрады
Түркістан облысының полицейлері көлігінің үстіне бірнеше адамды отырғызып, жол жүрген жүргізушіні әкімшілік кодекстің төрт бабымен жауапқа тартатын болды, – деп хабарлайды Polisia.kz.
Бұған дейін ВАЗ-2106 автокөлігінің үстінде бірнеше адамның отырып алған бейнежазбасы әлеуметтік желілерде тараған болатын. Полиция жүргізушінің жеке басын анықтады. Тексере келе, Ордабасы ауданының тұрғыны 1 наурыз күні көлік тізгінінде отырған сайрамдық азаматқа машинасын сатқаны белгілі болды.
«Тәртіп сақшылары автокөліктің жаңа иесіне ҚР Әкімшілік құқық бұзушылық туралы кодекстің төрт бабы бойынша хаттама толтырды: 230-бабы – «Қазақстан Республикасының мiндеттi сақтандыру туралы заңнамасын бұзу», 590-бабы – «Көлік құралдарын пайдалану қағидаларын бұзу», 593-бабы – «Жол жүрісі қағидаларында жолаушыларды және жүктерді тасымалдау, қауіпсіздік белдіктерін немесе мотошлемдерді пайдалану жөніндегі талаптарды сақтамау», 612-бабы – «Құжаттары жоқ және басқару құқығы жоқ адамның көлік құралын басқаруы»,-делінген баспасөз хабарламасында.
Көлік тізгінінде болған азамат өзінің әрекеті заңсыз болғанын және жолаушылардың өміріне қауіп төндіргенін мойындап, кешірім сұрап, алдағы уақытта қайталамайтынын айтты.