Жайық өңірінде еңбек озаттары марапатталды

Жайық өңірінде күзгі жиын-терін аяқталып, диқандардың сабантой мерекелері өткізілуде. Таяуда осындай шара Бәйтерек ауданында ұйымдастырылып, оған облыс әкімі Ғали Есқалиев арнайы барды деп хабарлайды Azattyq Ruhy тілшісі.

«Облысымыздағы жалпы егістік алқабының тең жартысы Бәйтерекке тиесілі. Ауа райы қолайлы болып, заманауи техниканы пайдаланудың нәтижесінде биыл өнім мол шықты, қамбамыз дәнге толды. Орта есеппен гектарына 16 центнер бидай орылды. Бұл соңғы он жыл ішіндегі ең жақсы көрсеткіш. Осы көрсеткіштің астарында елдің берекесі, еңбеккерлердің табысы жатыр. Әсіресе, бізді жастардың құлшынысы қуантады», - деді құттықтау сөзінде Ғ.Есқалиев.

Содан соң өңір басшысы бір топ ауыл шаруашылығы саласының үздіктерін өзінің алғысхатымен марапаттады. Олардың арасында «Алтын бидай», «Август» шаруа қожалықтарының механизаторлары Арон Исқалиев пен Дмитрий Ганенков, «Ирменов», «Гатауов» шаруа қожалықтарының жетекшілері Мұтиғолла Ирменов пен Мэльс Гатауовтар болды.

Сол секілді Нұрлан Карин «Ауыл шаруашылығының үздігі» атанып, «Раздолье» ЖШС директоры Мұхит Талиев, «Шонайбеков» ШҚ жетекшісі Сергей Шонайбеков ІІІ дәрежелі «Еңбек даңқы», «Гурсаев» ШҚ жетекшісі Арзамат Гурсаев, «Агросервис Батыс» ЖШС директоры Азамат Бисенов, «Горбачев» ШҚ қымыз дайындаушысы Ольга Агапова, «Ливкино» ЖШС тракторшысы Сергей Понмарев ІІІ дәрежелі «Елеулі еңбегі үшін» төсбелгілерімен марапатталды.

Аудан әкімінің алғысхатына «Кужгалиева» ШҚ басшысы Светла Кужгалиева, «Агросервис Батыс» ЖШС операторы Алексей Егоров ие болса, БҚО ауыл шаруашылығы басқармасының алғысхатын «Ақас» ЖШС көлік жүргізушісі Абылай Қаташев, «Виктория» ШҚ басшысы Денис Павочка алды.

Өңір басшысы ауыл шаруашылығы өнімдерінің жәрмеңкесін көрді. Мұнда «Белес Агро» ЖШС, «Каверин» ЖК, «Қаз ақбас» ЖШС, «Сағынғалиева» ЖК, «Панфилов» ЖК, «Ақас» ЖШС, «Қайнар» АӨК, «Жайық ет» ЖШС, «Асан ауыл» серіктестіктері өз өнімдерін халыққа арзан бағамен ұсынды. Мәселен, еттің келісі – 1700, тауықтың сан еті – 950, шұжық – 2400, картоп – 110, қызанақ – 100-150, орамжапырақ – 70-100, пияз – 70-120, сәбіз – 100-150 теңгеден сатылды.