Ақтөбе әкімдігі діни экстремизм мен терроризмнің алдын алу үшін не істеп жатыр?

Ақтөбе облысы деструктивті ағым өкілдерінің шоғырланған өңірлерінің бірі. Мұнда дәстүрлі емес ислам ұстанушыларымен түсіндіру жұмыстары жиі жүргізіліп келеді. Ақтөбе қалалық әкімдігі жастар санасының уланбауы үшін де алдын алу шараларын тоқтатқан емеспіз дейді. Әсіресе, мешітке баратын жамағат басты назарда. Олардың ислам жолында адасып кетпеуі үшін имамдар еркін форматта әңгіме-дүкен құрады. Түрлі экскурсия, жарыстар тек ерлердің ғана емес, қыз-келіншектердің де арасында да өтеді. Azattyq Ruhy тілшісі нақты қандай шаралардың ұйымдастырылатынын әкімдіктен сұрап білген еді.

«Ақтөбе қаласында діни экстремизм мен терроризмнің алдын алу бағытында түрлі бірлескен шаралар өтіп жатыр. Солардың бірі – діндар жамағат арасында ұлттық спорт түрлерін насихаттау және дәріптеу мақсатында түрлі спорттық сайыстар.

Мәселен, биыл шілде-тамыз айларында Ақтөбе қаласындағы мешіт жамағаттары арасынан 12 команда жасақталып, 150 ойыншының қатысуымен шағын футболдан «Ислам-1» лигасы өткізілді. Спорттық шараны өткізу мақсаты діни ағымдағы жастарды бауырмалдыққа, ауызбіршілікке шақыру. Сонымен қатар, діндар жастардың жат ағымның жетегіне кетіп қалмауының алдын алу және ұлттық құндылықтарды дәріптеп, дәстүрлі дінді насихаттау.

Жарыстың қорытындысы бойынша «Ислам-1» лига ойындарының ақтық сайысы өз мәресіне жетіп төрешілердің шешіміне сәйкес ойын жеңімпаздары анықталды:

1-орынға қалалық орталық мешітінің құрама командасы;

2-орынға «Әс-Сәлам» мешітінің жамағаты;

3-орынға «Бақытжан» мешіті құрама командасы ие болды.

Жеңімпаз командаларға бағалы сыйлықтар табысталды», - дейді Ақтөбе қаласы әкімі аппаратының терроризмге қарсы комиссия жұмысын үйлестіру бөлімінің басшысы Қайрат Есенжолов.

Мұндай жастарды жұмылдыратын жарыстарға орталық мешітінің найб имамы Марал Имағамбетов те қатысып, еркін форматта ақпараттық-түсіндіру жұмыстарын жүргізеді екен. Бұл діннен аса хабары жоқ азаматтардың жат ағымның жетегінен сақтайды деп сендірді мамандар. Сондай-ақ, әйел кісілердің арасында да экскурсия ұдайы ұйымдастырылады.

«Ақтөбе облысының киелі, тарихи мәдени жерлеріне экскурсия ұйымдастырылуда. Ағымдағы жылдың тамыз айында қаламыздағы әйел жамағаты арасында Ақтөбе облысы Қобда ауданы Әлия Молдағұлова атындағы тарихи-мәдени мұражайына экскурсия ұйымдастырылды. Жалпы экскурсияға 20-ға жуық діндар әйел жамағаты қатысып батыр қыздың өмірі мен ерлігі туралы ақпараттармен танысты. Шараның мақсаты жас ұрпақтың Отанға деген сүйіспеншілігін арттырып, патриоттық тәрбие беру», - деп түісіндірді терроризмге қарсы комиссия жұмысын үйлестіру бөлімінің басшысы Қайрат Есенжолов.

Сондай-ақ, осы экскурсия шеңберінде әйел жамағаттарымен Ақтөбе қаласында орналасқан «Мақта қыз» тігін цехінде «тігін ісі» атты мастер класс семинар өткен. Қатысушыларға ұлттық нақыштағы кіим тігудің ерекшеліктері түсіндіріліп, тігу технологиялары үйретіліпті.

«Бұл шара аясында әйел жамағатының сұранысы бойынша «Аль-Азхар» Египет университетінің исламтану факультетінің магистранты Бақытгүл Байғазиева шақыртылып, топтық кездесу ұйымдастырылды. Қазіргі таңда, «Мақта қыз» тігін цехінде 3 әйел жұмыс істейді», - деп атап өтті Қайрат Есенжолов.

Жақында қаладағы мешітке барып жүрген жамағат арасында Ақтолағай үстіртіне эксурсия ұйымдастыру көзделген. Мамандар басты мақсат – жамағатқа Қазақстанның тарихи құндылықтарын дәріптеу және насихаттау екенін алға тартты. Еркін форматта өтетін ақпараттық-түсіндіру жұмыстарын жүргізуге Ақтөбе облыстық «Нұр Ғасыр» мешітінің найб имамы Нұрбол Смағұловты шақырылмақшы.

Еске сала кетейік, Ақтөбе өңірінде діни радикалдар 2011 жылдан бері бірнеше рет террористік акт ұйымдастырды. Сол 2011 жылдың мамыр айында Рахымжан Махатов есімді азамат ҰҚК-нің облыстық ғимаратына барып, өзін жарып жіберген. Лаңкестің өзі осы жарылыстан қаза тапса, ғимаратта болған үш адам ауыр дене жарақаттарын алды. Артынша Құқық қорғау органдары деструктивті діни ағым ұстанатын 20-ға жуық адамды қолға түсіріп, соттады.

Сондай-ақ, осы жылы Ақтөбе облысының Кеңқияқ пен Шұбарши деп аталатын ауылдарында да террористік актілер тіркелген еді. Полицияның екі бірдей қызметкерін атып өлтіргеннен кейін күштік құрылымдар Темір ауданында арнайы операция жүргізіп, 8 лаңкестің көзін жойған.

Ал, 2016 жылы лаңкестік оқиға Ақтөбе қаласының өзінде болды. Террористер алдымен «Паллада» және «Пантера» қару-жарақ дүкендеріне шабуыл жасап, кейін №6655 әскери бөлімінің қару-жарақ қоймасын басып алмақ болған. Кескілескен атыста барлығы 6 лаңкестің көзі жойылып, қалғандары тірідей ұсталып сотталған.