Семейде Ауған соғысында ерлікпен қаза тапқан Раджан Батырқановқа құрмет көрсетілді

Семейде «Генералдар кеңесі» Республикалық қоғамдық бірлестігі тәжік-ауған шекарасындағы қарулы лаңкестермен қақтығыста батырлық көрсеткені үшін, өмірін сарп етіп, қызметтестерін құтқарғаны үшін жауынгер-интернационалист, шекарашы батыр Раджан Батырқановты «Қазақстан Республикасының тұңғыш қорғаныс министрі, Халық Қаһарманы, Кеңес Одағының Батыры, армия генералы – Нұрмағамбетов Сағадат Кожахметұлы» естелік медалімен қаза тапқаннан кейін марапаттады.

Сонымен қатар, ұйым атынан қаза болған батыр жанұясына 1 миллион теңге көлемінде материалды қолдау көрсетілді.

«Перзентіңіздің ерлік ісі батырлықтың айқын мысалы. Ол тек біздің елімізде ғана емес, шет елдерде де мойындалған. Раджан марапатталып отырған естелік медаль – Қазақстан Республикасының тұңғыш қорғаныс министрі Сағадат Нұрмағамбетов құрметіне аталған. Ол кісі де осындай жаста Кеңес Одағының Батыры атанды», - деді РҚБ президиумының төрағасы Махмұт Телегусов.

Облыстық Офицерлер үйінде өткен салтанатты шарада офицерлер, сарбаздар және жас әскерге шақырушыларға Раджан Батырқановтың ерлік ісі ерекше әсер етті.

Іс-шараны қорытындылай отырып, генерал-майор Телегусов «Әділдік Жолы» РҚБ алғыс білдірді. Ұйым осыған дейін қол қойылған меморандумға негізделіп, салтанатты басқосудың ұйымдастырылуы және өткізілуіне қолдау көрсетті.