Қазақстанда 1,8 мың адам КСРО-ның қызыл паспортымен жүрген - ІІМ

ІІМ Көші-қон комитеті төрағасының орынбасары Сабыржан Сейітжанов Қазақстанда 4,5 мыңнан астам адамның құжатсыз жүргені анықталғанын мәлімдеді.

«Қазақстанда құжатсыз жүрген 4686 адам анықталды. Олар негізінен Алматы, Қарағанды, Түркістан, Ақмола және Жамбыл облыстарында тұрған. Бүгінде құжатсыз осы азаматтардың 3408-не жеке куәлік берілді. Ал қалған 1278 адамды құжаттандыру жұмысы жүріп жатыр», - деді ІІМ өкілі ОКҚ-да өткен брифингте.

Сабыржан Сейтжановтың айтуынша, 1 797 адамның КСРО-ның қызыл паспортымен жүргені белгілі болған.

Еске салайық, Қазақстанда 2020 жылдың қазанынан бастап азаматтығы анықталмаған адамдарды анықтап, оларды құжаттандыру бойынша акция жүріп жатыр.