Қазақстанда 20 шақты санитарлық бекет қойылды

Ішкі істер министрі Ерлан Тұрғымбаев коронавирустың таралуына байланысты республика бойынша 19 санитарлық бекет қойылғанын айтты.

«Бас санитар дәрігерлердің қаулысына сәйкес, еліміз бойынша 15 санитарлық (Алматы облысы – 9, Қостанай облысы – 4 және Ақтөбе облысы – 2) және 4 блок-бекет (Атырау облысы - 4) қойылған», - деді министр Үкімет отырысында.

Министрдің айтуынша, Ішкі істер министрлігі карантин және шектеу шараларын қамтамасыз ету бойынша денсаулық сақтау органдарына көмек көрсетуді жалғастырып жатыр. Қазір бұл іс-шараларға 10 мыңнан аса полиция мен Ұлттық ұланның әскери қызметшілері жұмылды. Сондай-ақ 290 карантин нысаны бақылауда.