КВИ-ге қарсы вакцина салдыру: өзге елде – президенттер, Қазақстанда – дәрігерлер мен мұғалімдер

Соңғы бір айда әлемде ең көп талқыланған тақырып – коронавирусқа қарсы вакцина. Дүниежүзілік денсаулық сақтау ұйымының мәліметі бойынша, бүгінге дейін клиникалық сынақтан барлығы 47 вакцина өтуде. Олардың 10-ы үшінші сынақ кезеңіне жетті. Олардың қатарында – ресейлік «Спутник V», неміс және америкалық компаниялар бірлесіп жасаған Biontech және Pfizer, америкалық Мoderna Inc компаниясы өндірген эксперименттік mRNA-1273 вакцинасы бар.

Ал Қазақстан клиникалық сынамадан өтіп жатқан коронавирусқа қарсы ресейлік «Спутник V» екпесінің 2 миллион дозасын әкелуді жоспарлап отыр. Екпе ең алдымен дәрігерлер, педагогтер мен полиция қызметкерлеріне салынады.

21 желтоқсаннан бастап Қазақстанда коронавирусқа қарсы ресейлік ғалымдар ойлап тапқан «Спутник V» вакцинасы өндіріле бастады.

19 желтоқсанда отандық QazCovid-in вакцинасын клиникалық сынақтан өткізудің соңғы ІІІ сатысы басталды. Оның шеңберінде 3 мың ерікті азаматқа екпе егілуде.

Ал әлемнің басқа елдерінде вакцинациялау мәселесі қалай жүзеге асып жатқанына келетін болсақ, АҚШ-тың болашақ президенті Джо Байден бүгін тікелей эфирде коронавирусқа қарсы Pfizer вакцинасын өзіне салдырды. Өкілдер палатасының спикері Нэнси Пелоси мен сенатор Митч Макконнелл де COVID-19 вакцинасының екі дозасының біріншісін алды.

Британияда «Сақиналар әміршісі» кинотрилогиясының жұлдызы, 81 жастағы Иэн Маккеллен 17 желтоқсанда коронавирусқа қарсы вакцина салдырушылардың алғашқысы болды.

Желтоқсан айының басында Британ корольдігінде 91 жастағы Маргарет Кинан есімді тұрғын екпе салдырып, қауіпсіз екенін көрсетті.

Желтоқсанның 18-інде АҚШ вице-президенті Майк Пенс пен оның әйелі Карен көпшіліктің көзінше Pfizer вакцинасын салдырды.

19 желтоқсанда Израиль премьер-министрі Беньямин Нетаньяху Тель-А-Шомердегі Шиба медициналық орталығында вакцина салдырып, елге үлгі көрсетті. Бұл Израиль телеарналарында тікелей эфирден көрсетілді.

Батыстың танымал тұрғындары неміс және америкалық компаниялардың бірлескен вакцинасына сенім білдірсе, атақты америкалық режиссер Оливер Стоун ресейлік вакцинаны таңдап, көпті таңғалдырды.

Ал Ресейде «Спутник V» вакцинасын алғашқы болып салдырған Мәскеу мэрі Сергей Собянин болды. 

Сонымен қатар, препарат Беларусь премьер-министрі Роман Головченкоға да егілді. Бұл шенеуніктер аздап бас айналғаннан басқа қауіпті ештеңе болмайтынына сендірді. 

Қазақстанда жаппай вакцинациялау басталмас бұрын, сынақтан өтетіндер қарапайым тұрғындар екенін айтып кеттік. Танымал тұлғалар арасында үлгі көрсеткендер де баршылық. Мәселен, Халықаралық вакцинология орталығының директоры Қайсар Табынов Аустралияда жасалған COVAX-19 вакцинасын таңдап, салдырды.

Сондай-ақ қыркүйек айында Білім және ғылым министрі Асхат Аймағамбетов те алғашқылардың бірі болып вакцинацияланды.

«Мен күн сайын клиникаға дейінгі зерттеу нәтижесімен танысып, тиімділігін көрдім. Сондықтан отандық вакцинаны салдыру туралы шешім қабылдадым. Содан бері көп уақыт өтті. Мен өзімді жақсы сезінемін, катаральды құбылыстар болған жоқ, температурам көтерілмеді», - деді ол қазан айының басында.

Айта кетерлігі, Қазақстанда жаппай вакцинациялау ерікті түрде жүзеге асады. 

Сымбат Ғалымжан, Нұр-Сұлтан