Карантин кезінде 600 той және ас беру рәсімі өткізілген – ІІМ

Карантин режимі енгізілгелі бері оны бұзудың 28 мың дерегі тіркелді. Оның ішінде 4600 факт сауда орындары мен дүкендердің еншісінде, тағы 1700 факт мейрамханалар мен кафелерде болған. Бұл туралы бүгін Үкімет отырысында Ішкі істер министрі Ерлан Тұрғымбаев мәлімдеді.

«Карантин талабын бұзудың басым бөлігі Қостанай облысы (5 мыңнан аса дерек), Батыс Қазақстан облысы (2,5 мың), Түркістан облысы (3,5 мың), Шығыс Қазақстан облысы (2 мың), Алматы қаласында (3,800 мың) байқалды. Анықталған деректер бойынша хаттамалар толтырылып, айыппұлдар салынды», - деді министр.

Оның айтуынша, карантин талаптарын бұзғандар ҚР Әкімшілік құқық бұзушылық туралы кодексінің 476, 478-баптары бойынша жауапқа тартылған.

«Полиция қызметкерлері қоғамдық тәртіпті бақылау кезінде той жасау, қоштасу рәсімін өткізудің 600 дерегін, демалыс аймақтарының жұмыс істеуінің 1 мыңнан аса дерегін анықтады», - деді Тұрғымбаев.

Сондай-ақ, министр 26-27 қыркүйекте елімізде карантин талаптары орындалмай, 41 рет той өткізілгенін айтты. Шараны ұйымдастырғандар жауапқа тартылған.