Бұл бастама 2 жастан 15 жасқа дейінгі балаларды қамтуы тиіс
Қазақстан Үкіметі балаларға арналған тегін авиатасымалдарды субсидиялаудың орындылығын пысықтайды, деп хабарлайды Azattyq Rýhy тілшісі LS-ке сілтеме жасап.
«Әділет» АҚЖ-да жарияланған «2020 жылдың соңына дейін экономикалық өсуді қалпына келтіру жөніндегі кешенді жоспарды бекіту туралы» қаулыға енгізілген түзетулерге сәйкес, 67-жол «tax free және kids go free тетіктерін енгізу бөлігінде туристік қызметті жетілдіру жөніндегі заң жобасы шеңберінде заңнамалық түзетулерді қабылдаудың орындылығын пысықтау» болып өзгертілді.
ҚР Қаржы, Ұлттық экономика, сондай-ақ Мәдениет және спорт министрліктері 2020 жылғы желтоқсан айына дейін мәселені пысықтауы тиіс.
Естеріңізге сала кетейік, мамыр айында Kazakh Tourism ұлттық компаниясы kids go free жобасын ұсынды. Ол бойынша,«1+2» есебімен, яғни, бір ересек адаммен бірге екі бала ел ішінде тегін ұша алады. Тегін ұшу екі жастан 15 жасқа дейінгі балаларды қамтиды. Ұлттық компанияның ақпараты бойынша, бұл демалысты 30% арзандатуға мүмкіндік береді.