Түркістан облысында жыл соңына дейін 48 мектеп пайдалануға беріледі

Түркістан облысында жыл соңына дейін 48 мектеп пайдалануға беріледі. Бұл туралы Өңірлік коммуникациялар қызметінде өткен брифингте облыс әкімі Өмірзақ Шөкеев мәлім етті, деп хабарлайды Azattyq Rýhy тілшісі «ҚазАқпарат»-қа сілтеме жасап. 

«Бүгінгі таңда өңірдегі эпидемиологиялық жағдай тұрақты. Облыстың бас санитарлық дәрігерінің келісімімен дәстүрлі оқытуға саны 180 баладан аспайтын шағын жинақты мектептерде рұқсат берілуі мүмкін. Түркістан облысында осындай 139 мектеп бар, олардың қабырғасында 12 мыңнан астам бала білім алуда. Осыған байланысты, аудандар мен қалалардың әкімдері, білім басқармасы барлық қауіпсіздік шараларын қабылдауы қажет. Ең алдымен, мектеп медициналық қызметкері студенттерді күні бойы қадағалап отыруы керек. Сондай-ақ, санитайзерлер орнату керек, ал әр партада тек бір оқушы болуы тиіс», - деді Ө.Шөкеев. 

Сонымен қатар, брифинг барысында өңір басшысы шалғайдағы ауылдарға интернет жүргізу, аз қамтылған отбасылардан шыққан балаларға компьютер беру және оқушыларды кітаптармен қамтамасыз ету мәселелерін қозғады.

«Аз қамтылған отбасылардан шыққан оқушылардың басым бөлігінде компьютерлер жоқ. Үкімет бұл мәселені пысықтауда. Өңір оқушылары үшін 57 мыңнан астам компьютер сатып алынады, олар бірінші тоқсанның соңына дейін қашықтықтан оқыту үшін аз қамтылған отбасы балалары мен педагогтарға уақытша пайдалануға беріледі», - деді аймақ басшысы. 

Айта кету керек, облыстың 838 елдімекенінің 707 тұрғыны интернетке және ұялы байланысқа қол жеткізе алады, 131 елді мекенде интернет желісі жоқ. Бұл мәселені оңтайлы шешу үшін ҚР Цифрлық даму, инновациялар және аэроғарыш өнеркәсібі министрлігі, ұялы байланыс операторлары «Қазақтелеком» АҚ-мен бірлесіп 2 жылдық даму бағдарламасын әзірлеуде.

«Сонымен қатар, оқу жылына дайындық барысында облыстың барлық білім беру мекемелерінде оқулықтар сатып алуға 100% қаражат бөлінді. 25 тамызға дейін барлық оқушылар қажетті оқулықтарды алады. Жыл соңына дейін облыста 48 мектеп пайдалануға беріледі»,-деп хабарланды.